చక్కెర కొరత భయాలు

సూపర్ మార్కెట్లు, క్విక్-కామర్స్ యాప్‌లలో కొనుగోళ్లపై పరిమితులు
న్యూఢిల్లీ: దేశంలో చక్కెర ఉత్పత్తి తగ్గడం, పండుగ సీజన్ సమీపిస్తుండటంతో పెరిగిన డిమాండ్ నేపథ్యంలో మార్కెట్‌లో చక్కెర కొరత ఆందోళనలు వ్యక్తమవుతున్నాయి. దీంతో రిటైల్ మార్కెట్లు, క్విక్-కామర్స్ ప్లాట్‌ఫారమ్‌లు చక్కెర కొనుగోళ్లపై పరిమితులు విధించాయి.

రిలయన్స్, డి-మార్ట్ వంటి ప్రముఖ మాల్స్‌లో ఒక్కో వినియోగదారునికి గరిష్టంగా 2 నుండి 3 కిలోల చక్కెరను మాత్రమే విక్రయిస్తున్నారు. జెప్టో, ఇన్‌స్టామార్ట్, బ్లింకిట్ వంటి యాప్‌లలో 1 కిలో ప్యాకెట్లయితే 2 లేదా 3 మాత్రమే ఆర్డర్ చేసేందుకు అనుమతినిస్తున్నారు. 5 కిలోల ప్యాక్ విషయంలో మాత్రం ఒక ప్యాకెట్‌కే పరిమితం చేశారు.

క్రిసిల్ (CRISIL) ఇంటెలిజెన్స్ నివేదిక ప్రకారం, సెప్టెంబర్ 2026తో ముగిసే ఈ నాటికి దేశంలో చక్కెర నిల్వలు 3.9 మిలియన్ టన్నులకు పడిపోనున్నాయి. ఇది గత ఐదేళ్ల సగటు (6.5 మిలియన్ టన్నులు) కంటే 40% తక్కువ కావడం గమనార్హం.

పరిస్థితిని అదుపులోకి తెచ్చేందుకు కేంద్ర ఆహార మరియు ప్రజా పంపిణీ శాఖ రంగంలోకి దిగింది. నెలకు 10 మెట్రిక్ టన్నుల కంటే ఎక్కువ చక్కెరను వాడే మిఠాయిల తయారీదారులు, శీతల పానీయాల కంపెనీలు, స్వీట్ షాపులు తమ అవసరాలకు సరిపడా 15 రోజుల కంటే ఎక్కువ నిల్వలను ఉంచుకోకూడదని స్పష్టమైన ఆదేశాలు జారీ చేసింది.

డిమాండ్ పెరగడంతో ఆగస్టులో చక్కెర ధరలు భారీగా పెరిగాయి. మహారాష్ట్ర, ఉత్తర ప్రదేశ్ ఎక్స్-మిల్ వద్ద 100 కిలోల చక్కెర ధర రూ. 5,700 నుండి రూ. 6,000 కు చేరింది.

గత నెలలో కిలో రూ. 48.70 గా ఉన్న దేశీయ సగటు రిటైల్ ధర, ప్రస్తుతం 29% పెరిగి కిలో రూ. 63 వద్ద కొనసాగుతోంది. కేంద్ర ప్రభుత్వం ప్రకటించే సెప్టెంబర్ నెల ఉచిత అమ్మకాల కోటా ఆధారంగానే రాబోయే రోజుల్లో చక్కెర ధరల గమనం ఆధారపడి ఉంటుందని పరిశ్రమ వర్గాలు భావిస్తున్నాయి.