అమెరికా, కెనడాల నుంచి భారీ పెట్టుబడులే లక్ష్యం

సీఎం భూపేంద్ర పటేల్
అహ్మదాబాద్: రాష్ట్రంలో వ్యాపార రంగాన్ని బలోపేతం చేయడం, భారీగా విదేశీ పెట్టుబడులను ఆకర్షించడమే లక్ష్యంగా చేపట్టిన అమెరికా, కెనడాల పర్యటన అత్యంత విజయవంతమైందని గుజరాత్ ముఖ్యమంత్రి భూపేంద్ర పటేల్ వెల్లడించారు. 'వైబ్రెంట్ గుజరాత్' కార్యక్రమంలో భాగంగా నిర్వహించిన ఈ పర్యటనలో అంతర్జాతీయ వ్యాపార వర్గాల నుంచి అనూహ్య స్పందన లభించిందని ఆయన తెలిపారు.

ప్రపంచ వేదికపై ప్రధాని నరేంద్ర మోదీ పెంపొందించిన విశ్వాసం కారణంగానే విదేశీ కంపెనీలు భారత్‌లో, ముఖ్యంగా గుజరాత్‌లో పెట్టుబడులు పెట్టేందుకు తీవ్ర ఆసక్తి చూపుతున్నాయని సీఎం పేర్కొన్నారు. భారత్‌కు వచ్చే విదేశీ ప్రత్యక్ష పెట్టుబడుల్లో (FDI) గరిష్ట వాటాను గుజరాత్‌కే తీసుకురావడమే తమ ప్రధాన ధ్యేయమని స్పష్టం చేశారు.

ఈ పర్యటనలో భాగంగా సెమీకండక్టర్, ఆర్టిఫిషియల్ ఇంటెలిజెన్స్ (AI), డేటా సెంటర్లు, అలాగే గిఫ్ట్ సిటీ (GIFT City)పై ఆసక్తి ఉన్న ప్రముఖ ఆర్థిక సంస్థల ప్రతినిధులతో కీలక చర్చలు జరిపినట్లు ఆయన చెప్పారు. త్వరలోనే గుజరాత్‌లోకి భారీ స్థాయిలో మూలధన పెట్టుబడులు రాబోతున్నాయని ముఖ్యమంత్రి ధీమా వ్యక్తం చేశారు.