national
2028-29 నాటికి పట్టు ఉత్పత్తిలో ప్రపంచంలోనే భారత్ నంబర్ వన్: కేంద్ర మంత్రి గిరిరాజ్ సింగ్ వెల్లడి
సూర్య జాతీయ డెస్క్: రాబోయే 2028-29 ఆర్థిక సంవత్సరం నాటికి ప్రపంచ పట్టు ఉత్పత్తి రంగంలో భారతదేశాన్ని అగ్రస్థానంలో నిలబెట్టడమే కేంద్ర ప్రభుత్వ ప్రధాన లక్ష్యమని కేంద్ర జౌళి శాఖ మంత్రి గిరిరాజ్ సింగ్ స్పష్టం చేశారు.
దేశంలో పట్టు ఉత్పత్తి ప్రగతిని వివరిస్తూ, 2014 నాటికి దేశీయ పట్టు ఉత్పత్తి కేవలం 26 వేల మెట్రిక్ టన్నులుగా మాత్రమే ఉండేదని, కేంద్రం చేపట్టిన సంస్కరణలు, పథకాల ఫలితంగా అది ప్రస్తుతం 42 వేల మెట్రిక్ టన్నులకు చేరిందని మంత్రి వివరించారు. అలాగే 2030-31 నాటికి దేశీయ ఉత్పత్తిని ఏకంగా 60 వేల మెట్రిక్ టన్నులకు చేర్చాలనే నిర్దిష్ట ప్రణాళికతో ముందుకు సాగుతున్నామని పేర్కొన్నారు.
ప్రస్తుతం అంతర్జాతీయ మార్కెట్లో చైనా పట్టు ఉత్పత్తి క్రమంగా తగ్గుముఖం పడుతుండటం భారతదేశానికి అద్భుతమైన అవకాశంగా మారిందని, భారతీయ పట్టుకు అంతర్జాతీయంగా ఆదరణ విపరీతంగా పెరుగుతోందని గిరిరాజ్ సింగ్ విశ్లేషించారు.
