నిబంధనలు పాటించనందుకు 15 విదేశీ క్రిప్టో ప్లాట్ఫారమ్లకు FIU-India నోటీసులు
న్యూఢిల్లీ: 'ప్రివెన్షన్ ఆఫ్ మనీ లాండరింగ్ యాక్ట్ (PMLA), 2002' నిబంధనలను పాటించకుండా చట్టవిరుద్ధంగా కార్యకలాపాలు సాగిస్తున్న 15 విదేశీ వర్చువల్ డిజిటల్ అసెట్ (VDA) సేవా ప్రదాతలకు 'ఫైనాన్షియల్ ఇంటెలిజెన్స్ యూనిట్-ఇండియా' (FIU-IND) షోకాజ్ నోటీసులు జారీ చేసింది. దేశంలో మనీ లాండరింగ్ నిరోధక విధానాలను ఉల్లంఘిస్తున్న సంస్థలపై చర్యల్లో భాగంగా PMLAలోని సెక్షన్ 13 కింద FIU-IND డైరెక్టర్ ఈ నోటీసులు ఇచ్చారు.
నోటీసులు అందుకున్న సంస్థలలో Weex, Blofin, RezorEx, Bitunix, DigiFinex, Toobit, XT.com, Latoken, WOO X, Pionex, ChangeNow, SimpleSwap, FixedFloat, WhiteBIT, Guardarian ఉన్నాయి. వీటికి సంబంధించి భారతదేశంలో అందుబాటులో ఉన్న అప్లికేషన్లు, URLలను వెంటనే తొలగించాలని ఇన్ఫర్మేషన్ టెక్నాలజీ (IT) చట్టం కింద సంబంధిత శాఖలకు సూచించింది.
మార్చి 2023లో తీసుకొచ్చిన నిబంధనల ప్రకారం, భారతీయ వినియోగదారులకు విదేశీ లేదా దేశీయ క్రిప్టో సేవలందించే ప్లాట్ఫారమ్లు భౌతిక ఉనికితో సంబంధం లేకుండా FIU-IND వద్ద 'రిపోర్టింగ్ ఎంటిటీ'గా నమోదు కావాల్సి ఉంటుంది. క్రిప్టోలు, నాన్-ఫంగబుల్ టోకెన్లు (NFT) నియంత్రణ పరిధిలో లేకపోవడం వల్ల ఇవి అత్యంత ప్రమాదకరమైనవని, వినియోగదారులు జాగ్రత్తగా ఉండాలని FIU-IND హెచ్చరించింది.
