భారత్, శ్రీలంకలు నాగరికత పరంగా కవలలు

రక్షణ మంత్రి రాజ్‌నాథ్ సింగ్
కొలంబో: భారత్, శ్రీలంకలు నాగరికత పరంగా కవలల వంటివని, సన్నిహిత పొరుగు దేశాలు మరియు సముద్రయాన భాగస్వాములని కేంద్ర రక్షణ మంత్రి రాజ్‌నాథ్ సింగ్ అభివర్ణించారు. శ్రీలంకలో మూడు రోజుల పర్యటనలో ఉన్న ఆయన కొలంబోలో ఆ దేశ అధ్యక్షుడు అనుర కుమార దిసనాయకేతో సమావేశమయ్యారు. ఈ సందర్భంగా ప్రాంతీయ భద్రత, రక్షణ, శాంతి మరియు ద్వైపాక్షిక సహకారాన్ని మరింత బలోపేతం చేయాలని ఇరు దేశాలు నిర్ణయించాయి.

అనంతరం శ్రీలంకలోని భారతీయ సమాజ సమావేశంలో ప్రసంగించిన రాజ్‌నాథ్ సింగ్, మోదీ నాయకత్వంలో భారత్ సాధించిన ఆర్థిక విప్లవాన్ని వివరించారు. భారతదేశ ఆర్థిక వ్యవస్థ గత దశాబ్దంలో $2 ట్రిలియన్ల నుండి $4 ట్రిలియన్లకు ఎదిగిందని, 2026-27 ఆర్థిక సంవత్సరం మొదటి త్రైమాసికంలో 7.8 శాతం వృద్ధి నమోదైందని తెలిపారు.

గత పదేళ్లలో భారత్ 38 దేశాలతో స్వేచ్ఛా వాణిజ్య ఒప్పందాలు కుదుర్చుకుందని, రక్షణ రంగ ఎగుమతులు రూ. 600 కోట్ల నుండి రికార్డు స్థాయిలో రూ. 39,000 కోట్లకు పెరిగాయని చెప్పారు. డైరెక్ట్ బెనిఫిట్ ట్రాన్స్‌ఫర్ (DBT) ద్వారా ప్రజల ఖాతాల్లోకి నేరుగా రూ. 51 లక్షల కోట్లు జమ అయ్యాయని, 25 కోట్ల మంది పేదరికం నుండి బయటపడ్డారని ఆయన పేర్కొన్నారు. ఈ కార్యక్రమంలో శ్రీలంక కేబినెట్ మంత్రి సరోజా సావిత్రి పాల్‌రాజ్, భారత హైకమిషనర్ సంతోష్ ఝా తదితరులు పాల్గొన్నారు.