ముగిసిన ప్రధాని మోదీ 4 రోజుల పర్యటన

బిష్కెక్‌లో ఎస్‌సిఓ (SCO) సదస్సు అనంతరం భారత్‌కు పయనం!
న్యూఢిల్లీ/బిష్కెట్: ప్రధాని నరేంద్ర మోదీ ఉజ్బెకిస్థాన్, కిర్గిజ్‌స్థాన్‌లలో తన నాలుగు రోజుల పర్యటనను విజయవంతంగా ముగించుకుని న్యూఢిల్లీకి బయలుదేరారు. బిష్కెక్‌లో జరిగిన 26వ షాంఘై సహకార సంస్థ (SCO) సదస్సులో పాల్గొన్న ప్రధానికి కిర్గిజ్‌స్థాన్ క్యాబినెట్ ఛైర్మన్ అడిల్‌బెక్ కసిమాలియేవ్ సాదరంగా వీడ్కోలు పలికారు.

ఉజ్బెకిస్థాన్ అధ్యక్షుడు షవ్‌కత్ మిర్జియోయెవ్‌తో భేటీ అయిన ప్రధాని, 2030 నాటికి ద్వైపాక్షిక వాణిజ్యాన్ని 5 బిలియన్ డాలర్లకు పెంచాలని లక్ష్యంగా పెట్టుకున్నారు. మైనింగ్, పర్యాటకం మరియు పౌర-అణుశక్తి రంగంలో యురేనియం సరఫరా ఒప్పందాలపై సంతకాలు చేశారు. ప్రధాని మోదీకి ఉజ్బెకిస్థాన్ ప్రతిష్టాత్మక ‘ఒలియ్ దరాజాలి దోస్త్లిక్’ పురస్కారాన్ని ప్రదానం చేయగా, ఆయన దీనిని 140 కోట్ల మంది భారత ప్రజలకు అంకితం చేశారు.

ఎస్‌సిఓ సదస్సులో ప్రసంగించిన ప్రధాని, ఉగ్రవాదానికి నిధుల సరఫరా, తీవ్రవాద ప్రేరణ మరియు ఉగ్రవాదులకు ఆశ్రయం ఇచ్చే వ్యవస్థలను సమూలంగా నిర్మూలించాలని పిలుపునిచ్చారు. ఉగ్రవాదంపై పోరులో ద్వంద్వ ప్రమాణాలకు తావులేదని స్పష్టం చేశారు.బిష్కెక్‌లో రష్యా అధ్యక్షుడు వ్లాదిమిర్ పుతిన్, ఇరాన్ అధ్యక్షుడు మసూద్ పెజెష్కియాన్, కిర్గిజ్ అధ్యక్షుడు సదిర్ జపరోవ్, అర్మేనియా ప్రధాని నికోల్ పాషిన్యాన్లతో పాటు తజికిస్తాన్, లావోస్ అధ్యక్షులతో ప్రధాని మోదీ వేర్వేరుగా సమావేశమయ్యారు.

రష్యా అధ్యక్షుడు పుతిన్‌తో మాట్లాడిన మోదీ, యుద్ధభూమిలో సమస్యలు పరిష్కారం కావని, చర్చలు మరియు దౌత్య మార్గమే ఏకైక మార్గమని నొక్కి చెప్పారు. కిర్గిజ్ ప్రజల ఆప్యాయతకు, అధ్యక్షుడు జపరోవ్ ఆతిథ్యానికి ధన్యవాదాలు తెలిపిన ప్రధాని మోదీ, ఈ పర్యటనతో భారత్‌కు గణనీయమైన ప్రయోజనాలు చేకూరాయని మరియు ఈ ప్రాంతంతో దౌత్య సంబంధాలు మరింత బలపడ్డాయని పేర్కొన్నారు.