శాంతి ఒప్పందానికి సిద్ధమైనప్పుడే పుతిన్తో భేటీ
డోనాల్డ్ ట్రంప్ వ్యాఖ్యలు
వాషింగ్టన్:రష్యా అధ్యక్షుడు వ్లాదిమిర్ పుతిన్తో భేటీ అయ్యేందుకు తాను సిద్ధంగా ఉన్నానని, అయితే అది ఇరు దేశాల మధ్య ‘శాంతి ఒప్పందం’ కుదుర్చుకోవడానికి సిద్ధంగా ఉన్న సమయంలోనే జరుగుతుందని అమెరికా అధ్యక్షుడు డోనాల్డ్ ట్రంప్ స్పష్టం చేశారు. వైట్హౌస్ ఓవల్ ఆఫీస్లో విలేకరులు అడిగిన ప్రశ్నకు సమాధానంగా ఆయన ఈ వ్యాఖ్యలు చేశారు.
వ్యాపారానికి మేలు చేసే భాగస్వామ్యం
రష్యా, ఉక్రెయిన్ సహా అన్ని దేశాలతో అమెరికా మంచి సంబంధాలను కొనసాగించాలని కోరుకుంటున్నట్లు ట్రంప్ పేర్కొన్నారు. ఇటువంటి సానుకూల సంబంధాలు వ్యాపార రంగానికి ఎంతో ప్రయోజనం చేకూరుస్తాయని అభిప్రాయపడ్డారు. రష్యా వద్ద అత్యంత విలువైన, అద్భుతమైన భూభాగం ఉందని, అక్కడ ప్రస్తుతం మంచి పరిణామాలు చోటుచేసుకుంటున్నాయని ఆయన వ్యాఖ్యానించారు.
యుద్ధం ముగింపు దశలోనే సమావేశం
పుతిన్తో భేటీని వెంటనే ఏర్పాటు చేయగలననే నమ్మకం తనకు ఉందని, అయితే రష్యా-ఉక్రెయిన్ యుద్ధం ముగింపు దశకు చేరుకున్న తరుణంలోనే ఆ భేటీ జరగాలని తాను ఆశిస్తున్నట్లు ట్రంప్ వెల్లడించారు. త్వరలోనే ఆ దిశగా సానుకూల ఫలితాలు వస్తాయని ఆయన ఆశాభావం వ్యక్తం చేశారు.
