యుద్ధ నేరాల కేసులో కొసోవో మాజీ అధ్యక్షుడు థాసికి 25 ఏళ్ల జైలు శిక్ష

ది హేగ్:హత్యలు, హింస, అక్రమ నిర్బంధం వంటి యుద్ధ నేరాలకు పాల్పడినట్లు రుజువు కావడంతో కొసోవో మాజీ అధ్యక్షుడు హషిమ్ థాసికి (58) ప్రత్యేక ట్రిబ్యునల్ 25 ఏళ్ల జైలు శిక్ష విధించింది. 1990వ దశకంలో సెర్బియా నుంచి కొసోవో విడిపోయే సమయంలో కొసోవో లిబరేషన్ ఆర్మీ (KLA) అగ్ర కమాండర్‌గా వ్యవహరించిన థాసి, 96 మంది రాజకీయ ప్రత్యర్థులను హత్య చేయించడమే కాకుండా వందలాది మందిని హింసించి, అక్రమంగా నిర్బంధించడంలో చురుగ్గా పాల్గొన్నారని కోర్టు స్పష్టం చేసింది.

హేగ్‌లోని కొసోవో స్పెషలిస్ట్ ఛాంబర్స్ ఈ తీర్పును వెలువరించగా, థాసి తనపై ఉన్న ఆరోపణలన్నింటినీ ఖండించారు. 1998-99 నాటి ఈ ఘర్షణలు ఇప్పటికీ అల్బేనియన్లు, సెర్బ్‌ల మధ్య ఉద్రిక్తతలకు కారణమవుతున్నాయి. ఈ తీర్పుపై కొసోవోలోని అల్బేనియన్ వర్గాలు తీవ్ర ఆగ్రహం వ్యక్తం చేశాయి. దేశ రాజధాని ప్రిస్టినాలో వేలాది మంది ప్రజలు భారీ స్క్రీన్‌లపై తీర్పును వీక్షిస్తూ, ట్రిబ్యునల్‌కు వ్యతిరేకంగా నినాదాలు చేశారు.