9/11 దాడులకు 25 ఏళ్లు..‘ఆ రోజే ప్రపంచం మారిపోయింది’ అన్న డోనాల్డ్ ట్రంప్

న్యూయార్క్: 2001 సెప్టెంబర్ 11న అమెరికాపై జరిగిన భీకర ఉగ్రవాద దాడుల 25వ వార్షికోత్సవం (పావు శతాబ్దం) సందర్భంగా అమెరికా అధ్యక్షుడు డోనాల్డ్ ట్రంప్ ఆనాటి ఘోర కలికాలాన్ని తీవ్ర విచారంతో గుర్తుచేసుకున్నారు. మిడ్‌టౌన్ మాన్‌హట్టన్‌లోని తన అపార్ట్‌మెంట్ నుంచి వరల్డ్ ట్రేడ్ సెంటర్‌పై జరిగిన దాడిని ప్రత్యక్షంగా చూశానని, ఆ క్షణమే ‘ప్రపంచం మారిపోయింది’ అని తనకు అర్థమైందని ఆయన తెలిపారు.

ఫాక్స్ న్యూస్‌కు ఇచ్చిన ప్రత్యేక ఇంటర్వ్యూలో ట్రంప్ మాట్లాడుతూ.. మొదట టీవీలో బాయిలర్ పేలుడు అని వార్తలు వచ్చినా, తన విండో నుంచి చూసినప్పుడు ప్రమాదం తీవ్రత అర్థమైందన్నారు. రెండవ విమానం ట్విన్ టవర్స్‌ను ఢీకొట్టడం చూసి దిగ్భ్రాంతి చెందానని, అది క్షిపణి ఏమో అని మొదట భావించానని చెప్పారు. దాడి జరిగిన మరుసటి రోజే తాను ఆ ప్రాంతానికి వెళ్లానని, అక్కడ నెలకొన్న భయానక వాతావరణం, నిస్సహాయత తనను తీవ్రంగా కలచివేశాయని పేర్కొన్నారు. అయితే న్యూయార్క్ ప్రజల ధైర్యాన్ని, గ్రౌండ్ జీరో పునర్నిర్మాణంలో వారు చూపిన వేగాన్ని ఆయన కొనియాడారు.

దాదాపు 3,000 మంది అమాయకుల ప్రాణాలను బలిగొన్న ఈ ఘటన అమెరికా భద్రతా విధానాలనే కాకుండా ప్రపంచ రక్షణ రంగాన్ని సమూలంగా మార్చివేసిందని ఆయన అభిప్రాయపడ్డారు. 2001 సెప్టెంబర్ 11న అల్-ఖైదా ఉగ్రవాదులు నాలుగు విమానాలను హైజాక్ చేసి న్యూయార్క్‌లోని ట్విన్ టవర్స్, వర్జీనియాలోని పెంటగాన్‌లపై దాడులకు తెగబడగా, నాలుగో విమానం పెన్సిల్వేనియాలో కూలిపోయింది. ఈ 25వ వార్షికోత్సవం సందర్భంగా అమెరికావ్యాప్తంగా ‘పేట్రియాట్ డే’ నిమిత్తం మౌన నివాళులు, స్మారక కార్యక్రమాలు నిర్వహించేందుకు సన్నాహాలు చేస్తున్నారు.