చింతకుంట కెనాల్ వద్ద ఉద్రిక్తత
నీళ్ల విడుదల కోరుతూ బీజేపీ ధర్నా.. పోలీసులతో వాగ్వాదం….
డిప్యూటీ మేయర్ సునీల్రావు, జిల్లా అధ్యక్షుడు సాయిని మల్లేశం సహా పలువురు అరెస్ట్…
సూర్య కరీంనగర్ ప్రతినిధి::
కరీంనగర్: గణేశ్ నిమజ్జనోత్సవాలకు చింతకుంట కెనాల్లో నీటిని విడుదల చేయాలని డిమాండ్ చేస్తూ బీజేపీ నాయకులు, కార్యకర్తలు చేపట్టిన ధర్నా సోమవారం ఉద్రిక్తతకు దారితీసింది. ధర్నా చేస్తున్న కార్యకర్తలను పోలీసులు అరెస్ట్ చేయడంతో ఇరువర్గాల మధ్య వాగ్వాదం చోటుచేసుకుంది. ఈ క్రమంలో పోలీసులు లాఠీఛార్జ్ చేశారని బీజేపీ నాయకులు ఆరోపించారు.
బీజేపీ ఓబీసీ మోర్చా జిల్లా అధ్యక్షుడు ఆకుల రాజేందర్పై పోలీసులు దాడి చేశారని, కార్యకర్తలను గల్లా పట్టుకుని ఈడ్చుకెళ్లారని నాయకులు ఆరోపించారు. కరీంనగర్ డిప్యూటీ మేయర్ యాదగిరి సునీల్రావు, బీజేపీ జిల్లా అధ్యక్షుడు సాయిని మల్లేశం, కరీంనగర్ పార్లమెంట్ కన్వీనర్ బోయినిపల్లి ప్రవీణ్రావులను పోలీసులు అరెస్ట్ చేసి స్టేషన్కు తరలించారు.ఈ సందర్భంగా సాయిని మల్లేశం మాట్లాడుతూ.. గణేశ్ నిమజ్జనానికి నీటిని విడుదల చేయాలని కోరితే లాఠీలతో కొట్టించడం దారుణమన్నారు. నిమజ్జనానికి నీటిని విడుదల చేసే వరకు ఉద్యమాన్ని కొనసాగిస్తామని తెలిపారు. బోయినిపల్లి ప్రవీణ్రావు మాట్లాడుతూ అర టీఎంసీ నీటిని అడిగితే ఇవ్వకపోవడం దుర్మార్గమన్నారు.డిప్యూటీ మేయర్ సునీల్రావు మాట్లాడుతూ.. నిమజ్జనోత్సవాలకు నగర పాలక సంస్థ అన్ని ఏర్పాట్లు చేసినప్పటికీ నీటిని విడుదల చేయకపోవడం బాధాకరమన్నారు. నిమజ్జనానికి తక్షణమే నీటిని విడుదల చేయాలని డిమాండ్ చేశారు. నీటిని విడుదల చేసే వరకు పోరాటం కొనసాగిస్తామని స్పష్టం చేశారు. పోలీసుల లాఠీఛార్జ్ను ఆయన ఖండించారు.
