నేటి విద్యార్థులే రేపటి ప్రజాస్వామ్యానికి వారసులు

ప్రధాన ఎన్నికల కమిషనర్ జ్ఞానేష్ కుమార్
అహ్మదాబాద్: యువ పౌరులలో ఎన్నికల అక్షరాస్యతను, ప్రజాస్వామ్య చైతన్యాన్ని పెంపొందించాల్సిన అవసరం ఎంతో ఉందని, నేటి విద్యార్థులే రేపటి ప్రజాస్వామ్యానికి నిజమైన వారసత్వ ప్రతినిధులని ప్రధాన ఎన్నికల కమిషనర్ (సీఈసీ) జ్ఞానేష్ కుమార్ పేర్కొన్నారు. అహ్మదాబాద్‌లో భారత ఎన్నికల సంఘం (ఈసీఐ) నిర్వహించిన "ఎలక్టోరల్ లిటరసీ క్లబ్‌లు (ఈఎల్‌సీలు) మరియు ఈసీఐనెట్" ఐదవ ప్రాంతీయ సదస్సులో ఆయన పాల్గొని ప్రసంగించారు.

ప్రపంచంలోనే అతిపెద్ద ప్రజాస్వామ్య వ్యవస్థకు ఎన్నికల అక్షరాస్యత క్లబ్‌లు వెన్నెముకగా నిలుస్తాయని సీఈసీ తెలిపారు. "ప్రజాస్వామ్యాన్ని నేర్చుకోండి.. ప్రజాస్వామ్యానికి నాయకత్వం వహించండి" అనే నినాదంతో రూపొందించిన 'ఈఎల్‌సీ 2.0' (ELC 2.0) వర్కింగ్ మోడల్‌ను ఈ సందర్భంగా ఆయన ప్రదర్శించారు. దేశంలో ఉన్న పాఠశాలలు, కళాశాలలు మరియు విశ్వవిద్యాలయాల డిజిటల్ నెట్‌వర్క్ ద్వారా యువతకు ఓటర్ల నమోదు, ఈవిఎంల పనితీరు, పోలింగ్ మరియు ఓట్ల లెక్కింపు ప్రక్రియలపై ఏడాది పొడవునా అవగాహన కల్పిస్తామని వివరించారు.

భారతదేశంలో ఎన్నికల ప్రక్రియ అంతా రాజ్యాంగ బద్ధంగా, పూర్తి పారదర్శకతతో సాగుతుందని ఆయన స్పష్టం చేశారు. ఈ కార్యక్రమంలో భాగంగా గుజరాత్ వ్యాప్తంగా విధి నిర్వహణలో విశేష సేవలు అందించిన 500 మందికి పైగా బూత్ స్థాయి అధికారులను (బీఎల్‌ఓలను) సీఈసీ ప్రత్యేకంగా అభినందించారు.