శ్రీ జగన్నాథ ఆలయ భూ నిర్వహణకు కొత్త నిబంధనలు

ఒడిశా కేబినెట్ ఆమోదం
భువనేశ్వర్: ఒడిశా వ్యాప్తంగా ఉన్న శ్రీ జగన్నాథ ఆలయ (SJT) భూముల నిర్వహణ, పరిష్కారంలో పారదర్శకత, జవాబుదారీతనం తెచ్చేందుకు ఉద్దేశించిన 'శ్రీ జగన్నాథ ఆలయ భూ నిర్వహణ నిబంధనలు, 2026'కు రాష్ట్ర మంత్రివర్గం ఆమోదం తెలిపింది. ముఖ్యమంత్రి మోహన్ చరణ్ మాఝీ అధ్యక్షతన సోమవారం సాయంత్రం జరిగిన కేబినెట్ సమావేశంలో ఈ నిర్ణయం తీసుకున్నారు. 1955 జగన్నాథ ఆలయ చట్టం ఆధారంగా రూపొందించిన ఈ కొత్త నిబంధనలు గతంలో ఉన్న 2003, 2019 నాటి యూనిఫామ్ పాలసీల స్థానంలో అమల్లోకి రానున్నాయి.

ఈ కొత్త చట్రం ద్వారా ఆలయ భూములకు సంబంధించిన దరఖాస్తుల స్వీకరణ, ధృవీకరణ మరియు పరిష్కారం కోసం పూర్తిగా ఆన్‌లైన్, పోర్టల్ ఆధారిత వ్యవస్థను ప్రవేశపెట్టనున్నారు. అలాగే కలెక్టర్ నేతృత్వంలో జిల్లా స్థాయి భూ కమిటీలను ఏర్పాటు చేసి, GIS-ఆధారిత డిజిటల్ మ్యాపింగ్ ద్వారా సమాచారాన్ని రెవెన్యూ శాఖ 'భూలేఖ్/భూనక్ష' పోర్టల్‌కు అనుసంధానించనున్నారు. ఆలయ సేవకులు, మఠాలు, ఇతర లబ్ధిదారులకు భూముల విలువ నిర్ణయంలో స్పష్టమైన నిబంధనలు పొందుపరిచారు. తప్పుడు పత్రాలతో భూ ఒప్పందాలు చేసుకుంటే కఠినమైన సివిల్, క్రిమినల్ చర్యలు తీసుకునేలా నిబంధనలను కఠినతరం చేశారు. ఈ నిబంధనలు ఒడిశా గెజిట్‌లో ప్రచురించిన నాటి నుండి రెండేళ్ల పాటు అమల్లో ఉంటాయి.