డేటా సెంటర్ రంగానికి 200 బిలియన్ డాలర్ల పెట్టుబడులు

కేంద్ర మంత్రి పీయూష్ గోయల్ వెల్లడి!
న్యూఢిల్లీ: భారతదేశాన్ని ప్రపంచ డేటా సెంటర్ హబ్‌గా తీర్చిదిద్దడమే లక్ష్యంగా కేంద్ర వాణిజ్య, పరిశ్రమల శాఖ మంత్రి పీయూష్ గోయల్ నేతృత్వంలో ఢిల్లీలో కీలక రౌండ్-టేబుల్ సమావేశం జరిగింది. ఈ రంగానికి చెందిన ప్రముఖులు, భాగస్వామ్య వర్గాలతో నిర్వహించిన ఈ భేటీ ఎంతో ఆశాజనకంగా, ఫలప్రదంగా సాగిందని మంత్రి వెల్లడించారు.

రాబోయే కాలంలో భారతదేశ డేటా సెంటర్ పరిశ్రమలోకి ఏకంగా 200 బిలియన్ డాలర్లకు పైగా పెట్టుబడులు వచ్చే అవకాశాలు స్పష్టంగా కనిపిస్తున్నాయని మంత్రి తెలిపారు. డేటా సెంటర్ల ఏర్పాటుకు ప్రపంచంలోనే భారత్ అత్యుత్తమ ప్రదేశమని, ఈ దిశగా 'ఈజ్ ఆఫ్ డూయింగ్ బిజినెస్' (వ్యాపార నిర్వహణ సులభతరం) మరింత మెరుగుపరిచేందుకు చర్యలు తీసుకుంటున్నామని పేర్కొన్నారు. ప్రపంచంలో రెండు చోట్ల యుద్ధాలు, ఆర్థిక అనిశ్చితి నెలకొన్నప్పటికీ, ప్రస్తుత ఆర్థిక సంవత్సరం మొదటి త్రైమాసికంలో భారత్ 7.8% వృద్ధిని నమోదు చేయడం దేశ ప్రజల శ్రమకు, ప్రధాని మోదీ నిర్ణయాత్మక నాయకత్వానికి నిదర్శనమని అభినందించారు.

'విక్షిత్ భారత్ 2047' లక్ష్యంలో భాగంగా డేటా సెంటర్లు, సెమీకండక్టర్ తయారీ, మరియు ఆర్టిఫిషియల్ ఇంటెలిజెన్స్ (AI) రంగాలు అత్యంత కీలకమైనవని పీయూష్ గోయల్ స్పష్టం చేశారు. ఈ రంగాలు పురోగతి సాధించడం ద్వారా 2047 నాటికి భారత్ 30 ట్రిలియన్ డాలర్ల ఆర్థిక వ్యవస్థగా అవతరిస్తుందని ఆశాభావం వ్యక్తం చేశారు. కేంద్ర, రాష్ట్ర ప్రభుత్వాల సమన్వయంతో పరిశ్రమ ఎదుర్కొంటున్న అనేక సమస్యలను ఇప్పటికే పరిష్కరించామని, పరిశ్రమ వర్గాల్లో కనిపిస్తున్న ఉత్సాహం ఎంతో సంతృప్తినిచ్చిందని ఆయన పేర్కొన్నారు.