దేశవ్యాప్తంగా 150 గతి శక్తి కార్గో టెర్మినళ్లు ప్రారంభం

కేంద్ర మంత్రి అశ్విని వైష్ణవ్
అహ్మదాబాద్: దేశవ్యాప్తంగా సరుకు రవాణా సామర్థ్యాన్ని బలోపేతం చేయడంలో భాగంగా 150 గతి శక్తి కార్గో టెర్మినళ్లను (GCT) అందుబాటులోకి తెచ్చినట్లు కేంద్ర రైల్వే శాఖ మంత్రి అశ్విని వైష్ణవ్ వెల్లడించారు. ఇందులో భాగంగా గుజరాత్‌లోని కచ్ (శివలఖ), భీమాసర్, దేవాలియా, చండీసర్ టెర్మినళ్లను మంగళవారం ప్రారంభించి దేశానికి అంకితం చేయగా, లించ్‌లో మరో టెర్మినల్‌కు శంకుస్థాపన చేశారు. ఈ సందర్భంగా శివలఖ జీసీటీ నుండి మిథాపూర్‌కు ఉప్పుతో నిండిన ప్రత్యేక సరుకు రవాణా రైలును ఆయన జెండా ఊపి ప్రారంభించారు.

ఉప్పు రవాణాలోని సవాళ్లను అధిగమించేందుకు ప్రత్యేకంగా స్టెయిన్‌లెస్ స్టీల్ కంటైనర్లను అభివృద్ధి చేసినట్లు మంత్రి తెలిపారు. కచ్ ప్రాంతంలో రూ.5,600 కోట్ల విలువైన రైల్వే ప్రాజెక్టులు కొనసాగుతున్నాయని, భుజ్-నలియా మార్గాన్ని బ్రాడ్ గేజ్‌గా మార్చడంతో పాటు జఖౌ పోర్ట్‌కు కొత్త మార్గాన్ని మంజూరు చేశామని వివరించారు. అలాగే ముంబై-అహ్మదాబాద్ హై-స్పీడ్ రైలు ప్రాజెక్టులో భాగమైన వాపి-సూరత్ సెక్షన్ నిర్మాణాన్ని 2026 డిసెంబర్ నాటికి పూర్తి చేయాలని లక్ష్యంగా పెట్టుకున్నామని, స్వదేశీ పరిజ్ఞానంతో రూపొందించిన మొదటి హై-స్పీడ్ రైలు కోచ్ ప్రస్తుతం పరీక్షల దశలో ఉందని తెలిపారు.