తెలంగాణలో గణేష్ మండపాలకు కొత్త రూల్.. ఆన్లైన్ రిజిస్ట్రేషన్ తప్పనిసరి!
రాష్ట్రంలో వినాయక చవితి ఉత్సవాలను అత్యంత వైభవంగా, ప్రశాంత వాతావరణంలో నిర్వహించేందుకు తెలంగాణ పోలీసు యంత్రాంగం ముందస్తు చర్యలు చేపట్టింది. ఇందులో భాగంగా హైదరాబాద్తో పాటు రాష్ట్రవ్యాప్తంగా గణేష్ మండపాల ఏర్పాటుకు సంబంధించి నూతన మార్గదర్శకాలను విడుదల చేసింది. ఉత్సవ కమిటీల నిర్వాహకులు ఎక్కడైనా మండపాలను ఏర్పాటు చేయాలంటే తప్పనిసరిగా ఆన్లైన్ ద్వారా ముందస్తు రిజిస్ట్రేషన్ చేసుకోవాలని స్పష్టం చేసింది. నిర్వాహకులు ఎలాంటి ఇబ్బందులు పడకుండా ఉండేందుకు పోలీసులు ప్రత్యేక పోర్టల్ను అందుబాటులోకి తీసుకువచ్చారు. ఆసక్తి గలవారు వెంటనే అధికారిక వెబ్సైట్ ద్వారా మండపం ఏర్పాటు చేసే ప్రాంతం, కమిటీ సభ్యుల వివరాలు, విగ్రహం ఎత్తు, నిమజ్జన తేదీ వంటి సమగ్ర సమాచారాన్ని నమోదు చేయాలని సూచించారు. తుది నిమిషం వరకు ఎలాంటి జాాప్యం చేయకుండా ఆన్లైన్ రిజిస్ట్రేషన్ పూర్తి చేసుకుని పోలీసు శాఖకు సహకరించాలని అధికారులు విజ్ఞప్తి చేస్తున్నారు. మండపాల ఏర్పాటుకు సంబంధించిన సమాచారం ముందస్తుగా అందుబాటులో ఉండటం వల్ల ఆయా ప్రాంతాల్లో గట్టి భద్రతను ఏర్పాటు చేయడానికి, ట్రాఫిక్ నియంత్రణకు అధికారులకు ఎంతో వెసులుబాటు కలుగుతుంది. నిమజ్జన వేడుకలు సజావుగా సాగేందుకు, అవాంఛనీయ సంఘటనలకు తావులేకుండా ఉండేందుకే ఈ డిజిటల్ విధానాన్ని అమలు చేస్తున్నట్లు పేర్కొన్నారు. నిర్వాహకులు నిబంధనలను పాటిస్తూ పండుగను విజయవంతం చేయాలని కోరుతున్నారు.
