టోక్యోలో క్రీడల మంత్రి మన్సుఖ్ మాండవియాకు ఘన స్వాగతం

టోక్యో:20వ ఐచి-నగోయా ఆసియా క్రీడలలో పాల్గొంటున్న భారత ప్రతినిధి బృందానికి నాయకత్వం వహించేందుకు జపాన్ చేరుకున్న కేంద్ర యువజన వ్యవహారాలు, క్రీడల శాఖ మంత్రి డాక్టర్ మన్సుఖ్ మాండవియాకు జపాన్‌లోని భారత రాయబారి నగ్మా మల్లిక్ టోక్యోలో శుక్రవారం ఉదయం ఘన స్వాగతం పలికారు. ఈ పర్యటన క్రీడలు, యువజన వ్యవహారాలతో పాటు ఇరు దేశాల ప్రజల మధ్య ద్వైపాక్షిక సహకారానికి మరింత ఊపునిస్తుందని జపాన్‌లోని భారత రాయబార కార్యాలయం పేర్కొంది. గత హాంగ్‌జౌ క్రీడల రికార్డు పతకాల పరంపరను అధిగమించడమే లక్ష్యంగా భారత్ ఈసారి పతక విజేతలతో కూడిన బలమైన జట్టుతో బరిలోకి దిగుతోంది.

శుక్రవారం రోజున క్రికెట్, సాఫ్ట్ టెన్నిస్, టెక్‌బాల్ వంటి ప్రధాన క్రీడాంశాల్లో భారత అథ్లెట్లు పోటీపడుతున్నారు. ఇందులో ముఖ్యంగా ఆతిథ్య జపాన్‌తో జరిగే భారత మహిళల క్రికెట్ జట్టు క్వార్టర్ ఫైనల్ మ్యాచ్‌పై అందరి దృష్టి నెలకొంది. ఇటీవల రికార్డు స్థాయిలో ఎనిమిదోసారి ఆసియా కప్ గెలుచుకున్న భారత మహిళల జట్టు, టీ20 ర్యాంకింగ్స్‌లో 3వ స్థానంలో నిలిచి ఆసియా క్రీడల స్వర్ణ పతక పోరులో హాట్ ఫేవరెట్‌గా బరిలోకి దిగుతోంది. టీ20 ర్యాంకింగ్స్‌లో 39వ స్థానంలో ఉన్న జపాన్‌తో భారత జట్టు తలపడటం ఇదే తొలిసారి.