పాకిస్తాన్ నిరంతరం ప్రధాన భద్రతా సమస్యే

మాజీ సీడీఎస్ జనరల్ అనిల్ చౌహాన్
న్యూఢిల్లీ: రాబోయే కాలంలోనూ భారతదేశానికి పాకిస్తాన్ ప్రధాన భద్రతా సవాలుగా, తీవ్రమైన ముప్పుగానే మిగిలిపోతుందని భారత త్రివిధ దళాల మాజీ అధిపతి (CDS) జనరల్ అనిల్ చౌహాన్ స్పష్టం చేశారు. న్యూఢిల్లీలోని తీన్ మూర్తి భవన్‌లో జరిగిన పండిత్ గోవింద్ వల్లభ్ పంత్ శతాబ్ది స్మారక ఉపన్యాస కార్యక్రమంలో "భారత భద్రతకు ఎదురవుతున్న సవాళ్లు-ముప్పులు" అనే అంశంపై ఆయన మాట్లాడారు.

పాకిస్తాన్ తన అణ్వాయుధ సామర్థ్యాన్ని అడ్డుపెట్టుకుని సంప్రదాయ యుద్ధ అవకాశాలను తగ్గిస్తూ, సరిహద్దు ఉగ్రవాదం మరియు పరోక్ష యుద్ధం (Proxy War) వంటి ఉప-సంప్రదాయ చర్యలకు ఎక్కువ ప్రాధాన్యత ఇస్తోందని ఆయన విశ్లేషించారు. పాకిస్తాన్ ప్రేరేపిత పరోక్ష యుద్ధాన్ని, ఉగ్రవాదాన్ని ఎదుర్కొనేందుకు భారత్ బలమైన మరియు విశ్వసనీయమైన నిరోధక శక్తిని (Credible Deterrence) నిరూపించాల్సిన అవసరం ఉందన్నారు.

ఉరి (Uri), బాలాకోట్ (Balakot) ఆపరేషన్లతో పాటు ఇటీవల చేపట్టిన 'ఆపరేషన్ సింధూర్' (Operation Sindoor) ద్వారా భారత్ తన సైనిక పటిష్టతను, సరిహద్దుల్లో వ్యూహాత్మక సామర్థ్యాన్ని ప్రపంచానికి చాటిచెప్పిందని గుర్తుచేశారు. ఉగ్రవాదాన్ని, పరోక్ష యుద్ధాన్ని తన ప్రభుత్వ విధాన సాధనంగా ఉపయోగించుకోవడాన్ని పాకిస్తాన్ స్వస్తి చెప్పేలా, దానికి అయ్యే మూల్యాన్ని (Cost) భారత్ భారీగా పెంచాల్సి ఉంటుందని వ్యాఖ్యానించారు. ఆపరేషన్ సింధూర్, భారత్-పాక్ దౌత్య ఒప్పందాల నిలిపివేత మరియు భారత్ తీసుకున్న కఠిన ఆచరణాత్మక చర్యల వల్ల పాకిస్తాన్ ప్రవర్తనలో కొంతైనా మార్పు వస్తుందని భావిస్తున్నట్లు తెలిపారు.

ఇటీవల కొన్ని దేశాలతో (సౌదీ అరేబియా, తుర్కియేలతో) పాకిస్తాన్ చేసుకున్న సైనిక ఒప్పందాలు ఆ దేశంలో అనవసర అతివిశ్వాసాన్ని నింపి, భారత్‌ విషయంలో మళ్లీ తప్పుడు అంచనాలు (Miscalculations) వేసే ప్రమాదం ఉందని జనరల్ అనిల్ చౌహాన్ హెచ్చరించారు. సరిహద్దుల్లో మారుతున్న సాంకేతిక విప్లవం, సైబర్, సమాచార యుద్ధ తంత్రాలను ఎదుర్కొనేందుకు భారత త్రివిధ దళాలు నిరంతరం సిద్ధంగా ఉండాలని ఆయన పిలుపునిచ్చారు.