భారత్-బెల్జియం రక్షణ మంత్రుల ద్వైపాక్షిక చర్చలు

రాజ్‌నాథ్ సింగ్ కీలక వ్యాఖ్యలు
న్యూఢిల్లీ:న్యూఢిల్లీలో భారత రక్షణ మంత్రి రాజ్‌నాథ్ సింగ్, బెల్జియం రక్షణ మంత్రి థియో ఫ్రాంకెన్ నేతృత్వంలోని ప్రతినిధి బృందంతో ఉన్నత స్థాయి చర్చలు జరిపారు. ఈ సమావేశంలో ఇరు దేశాల మధ్య రక్షణ, భద్రతా రంగాల్లో ద్వైపాక్షిక సహకారాన్ని మరింత బలోపేతం చేసుకోవడంపై విస్తృతంగా చర్చించారు.

రెండవసారి భారత్‌ను సందర్శిస్తున్న బెల్జియం రక్షణ మంత్రికి సాదర స్వాగతం పలికిన రాజ్‌నాథ్ సింగ్, ప్రస్తుత అంతర్జాతీయ పరిణామాలపై కీలక వ్యాఖ్యలు చేశారు.

రక్షణ మంత్రి రాజ్‌నాథ్ సింగ్ ప్రసంగ ముఖ్యాంశాలు... ప్రపంచం ప్రస్తుతం తీవ్రమైన భౌగోళిక, ఆర్థిక సంక్షోభాలను ఎదుర్కొంటోందని, అయితే ఈ పరిస్థితులు భారత్ వల్ల ఏర్పడకపోయినప్పటికీ సవాళ్లను ధైర్యంగా ఎదుర్కోవాల్సి ఉందన్నారు. ఇలాంటి సమయాల్లో బెల్జియం వంటి కీలక భాగస్వామ్య దేశంతో అభిప్రాయాలను పంచుకోవడం ఎంతో ఉపయోగకరంగా ఉంటుందన్నారు.

భారత్-బెల్జియం సంబంధాలు పరస్పర గౌరవం, ప్రజాస్వామ్య విలువలు మరియు నియమాల ఆధారిత అంతర్జాతీయ వ్యవస్థ పట్ల నిబద్ధతతో కూడుకున్నవని పేర్కొన్నారు.

ఇటీవల జూలై 2026లో జరిగిన భారత్-బెల్జియం వ్యూహాత్మక చర్చలు ఇరుదేశాల రక్షణ, భద్రతా సంబంధాలకు ఒక సంస్థాగత చట్రాన్ని అందించాయని గుర్తుచేశారు. బెల్జియం, భారత రక్షణ సంస్థల మధ్య మరింత విస్తృతమైన ఉమ్మడి సహకారాన్ని భారత్ ఆహ్వానిస్తుందని తెలిపారు.

ఈ చర్చలు భారత్-బెల్జియం వ్యూహాత్మక మరియు రక్షణ భాగస్వామ్యాన్ని కొత్త శిఖరాలకు తీసుకెళ్లడానికి దారితీస్తాయని భావిస్తున్నారు.