పశ్చిమ బెంగాల్లో మత విద్వేషాల కుట్ర కేసు: ఏజేయూపీ అధినేత హుమాయున్ కబీర్కు పోలీసుల సమన్లు
సూర్య జాతీయ డెస్క్: పశ్చిమ బెంగాల్లో మత విద్వేషాలను రెచ్చగొట్టేలా కుట్ర పన్నారన్న అభియోగాలపై ఆమ్ జనతా ఉన్నయన్ పార్టీ (ఏజేయూపీ) చీఫ్, ఎమ్మెల్యే హుమాయున్ కబీర్కు రాష్ట్ర పోలీసులు సమన్లు జారీ చేశారు. ముర్షిదాబాద్ జిల్లా కేంద్రంగా వివాదాస్పద వ్యాఖ్యలు, విద్వేషపూరిత ప్రసంగాల ద్వారా శాంతిభద్రతలకు విఘాతం కలిగించేలా ప్రవర్తించారన్న ఆరోపణలపై నమోదైన కేసుల దర్యాప్తు నిమిత్తం విచారణకు హాజరు కావాలని ఆదేశించారు. ఈ మేరకు సంబంధిత పోలీస్ స్టేషన్ అధికారులు హుమాయున్ కబీర్ నివాసానికి వెళ్లి నోటీసులు అందజేశారు.
ఉప ఎన్నికల ప్రచారాలు, రాజకీయ సభల నేపథ్యంలో ప్రాంతంలో ఉద్రిక్తతలకు కారణమయ్యేలా వ్యవహరించారంటూ ఆయనపై స్థానిక పోలీస్ స్టేషన్లలో ఎఫ్ఐఆర్లు నమోదయ్యాయి. ఒక మత వర్గాన్ని లక్ష్యంగా చేసుకుని రెచ్చగొట్టే వ్యాఖ్యలు చేయడంతో పాటు సామరస్యానికి తూట్లు పొడిచేలా కుట్ర పూరితంగా మాట్లాడారన్న ఫిర్యాదుల ఆధారంగా పోలీసులు కేసు దర్యాప్తును వేగవంతం చేశారు. ఈ పరిణామాలపై రాజకీయ వర్గాల్లో తీవ్ర చర్చ నడుస్తుండగా, వివాదాస్పద సమావేశాల నిర్వహణకు సహకరించిన పలువురు నిర్వాహకులను సైతం పోలీసులు అదుపులోకి తీసుకుని విచారిస్తున్నారు.
మరోవైపు తనపై వచ్చిన ఆరోపణలను హుమాయున్ కబీర్ ఖండిస్తూ, ఉప ఎన్నికల్లో తమ పార్టీ ఎదుగుదలను అడ్డుకోవడానికే రాజకీయ కుట్రతో కేసులు బనాయించారని ఆరోపించారు. అయితే చట్టాన్ని చేతుల్లోకి తీసుకుని శాంతిభద్రతలకు విఘాతం కలిగించే ప్రయత్నాలను ఎంతమాత్రం ఉపేక్షించబోమని అధికార యంత్రాంగం స్పష్టం చేసింది. వివాదాస్పద ప్రసంగాల రికార్డులను నిశితంగా పరిశీలిస్తున్న దర్యాప్తు అధికారులు, విచారణలో వెల్లడయ్యే వాస్తవాల ఆధారంగా కబీర్పై తదుపరి చట్టపరమైన చర్యలు ఉంటాయని వెల్లడించారు. సరిహద్దు ప్రాంతాల్లో శాంతిభద్రతలను కాపాడేందుకు పోలీస్ పహారాను మరింత కట్టుదిట్టం చేశారు.
