'ఆర్ట్ ఆఫ్ లివింగ్' 45 ఏళ్ల వేడుకల్లో అరవింద్ కేజ్రీవాల్

'సుదర్శన క్రియ' నేర్చుకుని అధికారికంగా కుటుంబంలో చేరానని ప్రకటన
బెంగళూరు: బెంగళూరులోని 'ఆర్ట్ ఆఫ్ లివింగ్ ఇంటర్నేషనల్ సెంటర్'లో ఆర్ట్ ఆఫ్ లివింగ్ ఫౌండేషన్ మానవాళికి అందిస్తున్న సేవల 45 ఏళ్ల వేడుకలు ఘనంగా జరిగాయి. ఈ కార్యక్రమానికి ఆమ్ ఆద్మీ పార్టీ (ఆప్) జాతీయ కన్వీనర్ అరవింద్ కేజ్రీవాల్, పంజాబ్ ముఖ్యమంత్రి భగవంత్ మాన్ మరియు ఆప్ సీనియర్ నేత మనీష్ సిసోడియా హాజరయ్యారు.

ఈ సందర్భంగా అరవింద్ కేజ్రీవాల్ మాట్లాడుతూ.. శ్రీ శ్రీ రవిశంకర్ గురూజీతో తనకున్న అనుబంధాన్ని గుర్తుచేసుకున్నారు. గత 20 ఏళ్లుగా గురూజీ నుంచి తనకు అపారమైన ప్రేమ, నమ్మకం లభించడం తన అదృష్టమని పేర్కొంటూ, 45 ఏళ్ల సేవా ప్రస్థానాన్ని పూర్తి చేసుకున్న ఆర్ట్ ఆఫ్ లివింగ్ సభ్యులందరికీ హృదయపూర్వక అభినందనలు తెలిపారు.

తీహార్ జైలు అనుభవం – సుదర్శన క్రియ
తాను గత వారమే 'సుదర్శన క్రియ' నేర్చుకున్నానని, దీని ద్వారా అధికారికంగా ఆర్ట్ ఆఫ్ లివింగ్ కుటుంబంలో సభ్యుడిగా చేరినట్లు కేజ్రీవాల్ వెల్లడించారు. తమపై తప్పుడు ఆరోపణల వల్ల తీహార్ జైలుకు వెళ్లాల్సి వచ్చిందని, అయితే అక్కడే మనీష్ సిసోడియా సుదర్శన క్రియను నేర్చుకున్నారని చెప్పారు. జైలు నుంచి విడుదలయ్యాక ఆ ధ్యాన ప్రక్రియ ఎంత అద్భుతంగా ఉంటుందో సిసోడియా చెప్పి, తనను కూడా సాధన చేసేలా ప్రేరేపించారని కేజ్రీవాల్ పేర్కొన్నారు.