స్విట్జర్లాండ్లో రేవ్ పార్టీలో కాల్పులు
స్విట్జర్లాండ్లో రేవ్ పార్టీలో కాల్పులు
జెనీవా: ఉత్తర స్విట్జర్లాండ్లోని ఆర్గౌ కాంటన్లో ఆదివారం తెల్లవారుజామున తీవ్ర దిగ్భ్రాంతికర సంఘటన చోటుచేసుకుంది. ఆరౌ పట్టణంలో నిర్వహించిన ఒక రేవ్ పార్టీలో గుర్తుతెలియని దుండగుడు జరిపిన కాల్పుల్లో 22 ఏళ్ల యువతి అక్కడికక్కడే మృతి చెందగా, మరో ఐదుగురు తీవ్రంగా గాయపడ్డారు.
జ్యూరిచ్కు సమీపంలోని ఆరౌలోని షాచెన్ గుర్రపు పందాల ట్రాక్ వద్ద “ఆరౌ రేవ్ వాల్యూమ్ 7” పేరిట సంగీత ప్రదర్శన ముగిసిన వెంటనే, తెల్లవారుజామున 2:30 గంటల ప్రాంతంలో ఈ కాల్పులు జరిగాయి. మొదట ఆ శబ్దాలను బాణసంచాగా పొరపాటు పడిన సందర్శకులు, 'అందరూ కిందకు వంగండి' అని అరవడంతో ప్రాణాలు కాపాడుకునేందుకు పరుగులు తీశారు.
కాల్పుల్లో 22 ఏళ్ల స్విస్ యువతి అక్కడికక్కడే ప్రాణాలు కోల్పోగా, 24 నుండి 27 ఏళ్ల వయస్సు గల నలుగురు యువకులు, ఒక యువతి తీవ్ర గాయాలతో ఆసుపత్రిలో చికిత్స పొందుతున్నారు. నేరానికి పాల్పడిన గుర్తుతెలియని నిందితుడు పరారీలో ఉన్నాడని, అతని కోసం జర్మనీ సరిహద్దుల వరకు విస్తృతంగా గాలింపు చర్యలు చేపట్టినట్లు కాంటోనల్ పోలీసులు 'X' (ట్విట్టర్) వేదికగా వెల్లడించారు.
ఘటనా స్థలంలో ఉన్న మిగిలిన సందర్శకులను సమీపంలోని జిమ్కు తరలించి, చుట్టుపక్కల ప్రాంతాలను పోలీసులు దిగ్బంధించారు. కాల్పులకు గల ఖచ్చితమైన కారణాలు ఇంకా తెలియరాలేదని, ఈ ఘటనకు సంబంధించిన ఫోటోలు లేదా వీడియోలు ఉన్న సాక్షులు వాటిని పోలీసులకు అందించాలని అధికారులు విజ్ఞప్తి చేశారు.
