తెలంగాణ అసెంబ్లీ వద్ద తీవ్ర ఉద్రిక్తత

కేటీఆర్, హరీష్ రావు సహా బీఆర్‌ఎస్ నేతల అరెస్ట్
హైదరాబాద్: తెలంగాణ అసెంబ్లీ ప్రాంగణం వద్ద తీవ్ర ఉద్రిక్త వాతావరణం నెలకొంది. రాష్ట్ర కాంగ్రెస్ ప్రభుత్వ 100 రోజుల పాలనకు నిరసనగా నల్ల టీ-షర్టులు ధరించి అసెంబ్లీకి వచ్చిన బీఆర్‌ఎస్ వర్కింగ్ ప్రెసిడెంట్ కేటీఆర్, ఎమ్మెల్యే హరీష్ రావుతో పాటు పలువురు ముఖ్య నాయకులను పోలీసులు అదుపులోకి తీసుకున్నారు.

సమావేశాలకు హాజరయ్యేందుకు వచ్చిన బీఆర్‌ఎస్ నాయకులు ప్రభుత్వం విధానాలకు వ్యతిరేకంగా గళమెత్తుతూ నినాదాలు చేశారు. ఈ సందర్భంగా వారు మాట్లాడుతూ.. లోక్‌సభలో ప్రతిపక్ష నాయకుడు రాహుల్ గాంధీ నల్ల చొక్కా ధరించి పార్లమెంటుకు వెళ్లినప్పుడు లేని అభ్యంతరం, తెలంగాణ అసెంబ్లీలో తమకు ఎందుకు ఎదురవుతోందని తీవ్ర ఆగ్రహం వ్యక్తం చేశారు. ప్రజాస్వామ్యబద్ధంగా నిరసన తెలిపే హక్కును ప్రభుత్వం కాలరాస్తోందని ఆరోపించారు. పోలీసులు బీఆర్‌ఎస్ నేతలను అదుపులోకి తీసుకుని సమీప పోలీస్ స్టేషన్‌కు తరలించడంతో అక్కడ కాసేపు గందరగోళ పరిస్థితి నెలకొంది.