కర్బన ఉద్గారాలపై అభివృద్ధి చెందుతున్న దేశాలనే నిందించడం తగదు: ప్రధాని మోదీ

సూర్య జాతీయ డెస్క్: గ్లోబల్ వార్మింగ్, వాతావరణ మార్పులకు కారణమవుతున్న కర్బన ఉద్గారాల పాపాన్ని ఎల్లప్పుడూ అభివృద్ధి చెందుతున్న దేశాలపైనే మోపడం ఎంతమాత్రం సరికాదని ప్రధానమంత్రి నరేంద్ర మోదీ స్పష్టం చేశారు. న్యూఢిల్లీలోని విజ్ఞాన్ భవన్‌లో జాతీయ హరిత ట్రైబ్యునల్ (ఎన్‌జీటీ) ఆధ్వర్యంలో పర్యావరణ భవిష్యత్తు మరియు వాతావరణ గతిశీలత అనే అంశంపై నిర్వహించిన రెండు రోజుల అంతర్జాతీయ సదస్సును ఆయన ప్రారంభించి ప్రసంగించారు. చారిత్రక వాస్తవాలను పరిగణనలోకి తీసుకుంటే భారత్‌లో తలసరి కర్బన ఉద్గారాలు ప్రపంచ సగటులో సగానికంటే తక్కువగా ఉన్నాయని ఆయన తెలిపారు. అభివృద్ధి చెందిన దేశాలలో తలసరి ఉద్గారాల స్థాయి భారత్ కంటే ఏకంగా ఆరు రెట్లు ఎక్కువగా ఉందని, అయినప్పటికీ ప్రతిసారీ గ్లోబల్ సౌత్ దేశాలనే లక్ష్యంగా చేసుకుని విమర్శలు గుప్పించడం అన్యాయమని ప్రధాని తేల్చిచెప్పారు.

పర్యావరణ పరిరక్షణలో భారత నిబద్ధతను ప్రపంచ దేశాల ముందు సగర్వంగా ప్రస్తావించిన ప్రధాని, జీ20 దేశాల కూటమిలో పారిస్ ఒప్పందం (కాప్-21) నిర్దేశిత లక్ష్యాలను గడువు కంటే ముందే పూర్తి చేసిన ఏకైక దేశం భారతదేశమేనని వెల్లడించారు. గత పుష్కర కాలంలో దేశంలో పునరుత్పాదక ఇంధన ఉత్పత్తి అద్భుత పురోగతి సాధించిందని వివరించారు. దేశ సౌర విద్యుత్ సామర్థ్యం 2 గిగావాట్ల నుంచి 160 గిగావాట్లకు పైగా పెరిగిందని, పీఎం సూర్య ఘర్ ముఫ్త్ బిజిలీ యోజన కింద ఇప్పటికే 50 లక్షలకు పైగా ఇళ్లపై సోలార్ ప్యానెళ్లను విజయవంతంగా ఏర్పాటు చేశామని చెప్పారు. రైల్వేలలో నూరు శాతం విద్యుదీకరణ పూర్తి చేయడం, ఎలక్ట్రిక్ వాహనాల సంఖ్య గణనీయంగా పెరగడం ద్వారా కోట్లాది టన్నుల కర్బన ఉద్గారాలను దేశం విజయవంతంగా నిలువరించిందని పేర్కొన్నారు.

అణు విద్యుత్, హరిత హైడ్రోజన్ వంటి స్వచ్ఛమైన ఇంధనాల దిశగా భారత్ వేగంగా అడుగులు వేస్తున్న తరుణంలో, పర్యావరణ పరిరక్షణ ముసుగులో కొందరు అడ్డంకులు సృష్టిస్తున్నారని ప్రధాని అసహనం వ్యక్తం చేశారు. దేశ క్లీన్ ఎనర్జీ ప్రాజెక్టులను అడ్డుకునేందుకు పర్యావరణ ఉపన్యాసాలు ఇచ్చేవారు కోర్టులను ఆశ్రయించడం విచారకరమని ఆయన అన్నారు. భారత్ ప్రకృతిని ఆరాధించే పురాతన సంస్కృతికి ప్రతీక అని, వాతావరణ సవాళ్లకు సరికొత్త పరిష్కారాలు చూపుతూ ప్రపంచానికి మార్గనిర్దేశం చేస్తోందని ఆయన చెప్పారు. వాతావరణ న్యాయం జరగాలంటే సంపన్న దేశాలు తమ కర్బన ఉద్గారాల ప్రభావాన్ని అంగీకరించి బాధ్యతాయుతంగా వ్యవహరించాలని, అభివృద్ధి చెందుతున్న దేశాలకు ఆర్థిక, సాంకేతిక సహకారం అందించాలని ప్రధాని మోదీ పిలుపునిచ్చారు.