అమెజాన్, ఇన్స్టామార్ట్, బిగ్ బాస్కెట్ ఫుడ్ లైసెన్సులు సస్పెండ్
ఆన్లైన్లో ‘ఉమ్మెత్త’ విక్రయాలు
బెంగళూరు: మానవ ఆరోగ్యానికి తీవ్ర హాని కలిగించే అత్యంత విషపూరితమైన 'ఉమ్మెత్త' (దాతూరా) కాయలు మరియు గింజలను ఆన్లైన్లో ఆహార పదార్థాలుగా విక్రయిస్తున్నట్లు తేలడంతో కర్ణాటక ఆహార భద్రత విభాగం (FDA) కఠిన చర్యలు తీసుకుంది. ప్రముఖ ఇ-కామర్స్, క్విక్ కామర్స్ ప్లాట్ఫామ్లైన అమెజాన్ (Amazon), స్విగ్గీ ఇన్స్టామార్ట్ (Swiggy Instamart), బిగ్ బాస్కెట్ (BigBasket)ల ఆహార లైసెన్సులను తాత్కాలికంగా సస్పెండ్ చేసింది.
అసలేం జరిగింది?
సాధారణంగా దేవుడి పూజలకు ఉపయోగించే ఉమ్మెత్త కాయలను కొన్ని ఆన్లైన్ ప్లాట్ఫామ్లు ఎఫ్ఎస్ఎస్ఏఐ (FSSAI) ఫుడ్ లైసెన్స్ నంబర్లతో ఆహార ఉత్పత్తుల విభాగంలో చూపిస్తూ విక్రయిస్తున్నట్లు అధికారుల దర్యాప్తులో బయటపడింది. ఒక ప్లాట్ఫామ్ ద్వారా ఉమ్మెత్త కాయను ఫ్రీ గిఫ్ట్గా పంపగా, దానిని ఒక చిన్న పాప తిని అస్వస్థతకు గురైనట్లు వచ్చిన ఫిర్యాదుతో అధికారులు తనిఖీలు చేపట్టారు. విషపూరితమైన ఈ ఉత్పత్తులను ఆహారంగా అమ్ముతుండటంతో ప్రజల ఆరోగ్యానికి తీవ్ర ప్రమాదం పొంచి ఉందని ఆహార భద్రత కమిషనర్ వెల్లడించారు.
నిబంధనల ఉల్లంఘనపై ఆగ్రహం
ఆహార భద్రతా చట్టం 2006 నిబంధనల ప్రకారం ఈ చర్యలు తీసుకున్నట్లు హెచ్డిఎ (FDA) తెలిపింది. దీనికి సంబంధించి సదరు కంపెనీల వివరణలు సంతృప్తికరంగా లేకపోవడంతో లైసెన్సుల సస్పెన్షన్ వేటు వేసింది.
అధికారుల ముఖ్య ఆదేశాలు
ఆన్లైన్ ప్లాట్ఫామ్లలో ఉన్న ఉమ్మెత్త కాయలు, విత్తనాల లిస్టింగ్లు, ప్రకటనలను వెంటనే తొలగించాలి.
ఈ ఉత్పత్తులను సరఫరా చేసిన వ్యాపారులు, సెల్లర్ల లైసెన్సులను కూడా రద్దు చేయాలని అధికారులకు ఆదేశాలు జారీ అయ్యాయి. భవిష్యత్తులో కూడా వీటిని ఆహార ఉత్పత్తులుగా ప్రదర్శించడం లేదా విక్రయించడం పూర్తి నిషిద్ధం.
