రాజస్థాన్ మున్సిపల్ ఎన్నికల్లో బీజేపీ ఘనవిజయం

అభివృద్ధి, సుపరిపాలనకే ప్రజల మద్దటన్న ప్రధాని మోదీ
జైపూర్: రాజస్థాన్ పట్టణ స్థానిక సంస్థల ఎన్నికల్లో భారతీయ జనతా పార్టీ (బీజేపీ) విజయం సాధించింది. ‘డబుల్ ఇంజిన్’ ప్రభుత్వ హయాంలో చేపడుతున్న అభివృద్ధి, సుపరిపాలన విధానాలకు ప్రజలు ఈ తీర్పు ద్వారా స్పష్టమైన మద్దతు తెలిపారని ప్రధాని నరేంద్ర మోదీ పేర్కొన్నారు.

ఈ విజయంపై ‘ఎక్స్’ (X) వేదికగా స్పందించిన ప్రధాని మోదీ, రాజస్థాన్ ప్రజలకు కృతజ్ఞతలు తెలిపారు. ఈ ఫలితాలు అబద్ధాల హోరుపై సత్యం సాధించిన విజయానికి నిదర్శనమని వ్యాఖ్యానించారు. రాష్ట్రాన్ని ప్రగతి పథంలో ముందుకు తీసుకెళ్లేందుకు ఈ తీర్పు తమ సంకల్పాన్ని మరింత బలపరిచిందని చెబుతూ, విజేతలకు, పార్టీ కార్యకర్తలకు అభినందనలు తెలిపారు.

కేంద్ర హోం మంత్రి అమిత్ షా స్పందిస్తూ, మోదీ నాయకత్వంలోని ప్రభుత్వం చేపడుతున్న సంక్షేమ, అభివృద్ధి కార్యక్రమాలకు ప్రజలు ఇచ్చిన ఆమోదముద్ర ఇది అని పేర్కొన్నారు. కాంగ్రెస్ పాలనలోని అవినీతి నుండి విముక్తి లభించాక రాష్ట్రంలో అభివృద్ధికి కొత్త ఊపు వచ్చిందని చెబుతూ, ముఖ్యమంత్రి భజన్ లాల్ శర్మ, రాష్ట్ర పార్టీ అధ్యక్షుడు మదన్ రాథోడ్‌లను ఆయన ప్రశంసించారు.

రాష్ట్ర వ్యాప్తంగా 309 పట్టణ స్థానిక సంస్థలలోని 10,245 వార్డులకు వెలువడిన ఫలితాల్లో బీజేపీ 4,179 వార్డులు గెలుచుకుని అతిపెద్ద పార్టీగా నిలవగా, కాంగ్రెస్ 3,613 వార్డులు, స్వతంత్రులు 2,273 వార్డులను కైవసం చేసుకున్నారు.

జైపూర్, కోటా, ఉదయపూర్, భిల్వారా మున్సిపల్ కార్పొరేషన్లలో బీజేపీ పాలక మండళ్లను ఏర్పాటు చేయనుండగా, బికనీర్ కార్పొరేషన్‌లో కాంగ్రెస్ స్పష్టమైన మెజారిటీ సాధించింది. అయితే అజ్మీర్, జోధ్‌పూర్, భరత్‌పూర్ సహా పలు స్థానిక సంస్థల్లో ఏ పార్టీకీ స్పష్టమైన మెజారిటీ లభించకపోవడంతో బోర్డుల ఏర్పాటులో స్వతంత్ర అభ్యర్థుల మద్దతు అత్యంత కీలకంగా మారనుంది.