ఇరాన్తో యుద్ధం ముగింపునకు చేరుకుంటోందని ఆశిస్తున్నాం
యు.ఎస్. అధ్యక్షుడు డొనాల్డ్ ట్రంప్
వాషింగ్టన్: ఇరాన్తో సాగుతున్న యుద్ధం ముగింపు దశకు చేరుకుంటోందని తాను భావిస్తున్నట్లు అమెరికా అధ్యక్షుడు డొనాల్డ్ ట్రంప్ వ్యాఖ్యానించారు. ఇరాన్ వైపు నుంచి తమకు నేరుగా సమాచారం అందిందని, వారు ఒప్పందానికి సిద్ధంగా ఉన్నట్లు కనిపిస్తోందని ఆయన బుధవారం సాయంత్రం విలేకరులతో మాట్లాడుతూ తెలిపారు.
ఇరాన్ యుద్ధం ఏడో నెలలోకి ప్రవేశించినప్పటికీ తక్షణ ముగింపు సంకేతాలు స్పష్టంగా కనిపించని తరుణంలో ట్రంప్ చేసిన ఈ వ్యాఖ్యలు ప్రాధాన్యత సంతరించుకున్నాయి. కాగా, వచ్చే వారం న్యూయార్క్లో జరగనున్న ఐక్యరాజ్యసమితి (UN) సర్వసభ్య సమావేశాల సందర్భంగా సౌదీ అరేబియా, యూఏఈ, ఖతార్, బహ్రెయిన్, కువైట్, ఒమన్ల ప్రతినిధులతో కూడిన గల్ఫ్ సహకార మండలి (GCC) నాయకులతో ట్రంప్ ప్రత్యేకంగా సమావేశం కానున్నట్లు అంతర్జాతీయ మీడియా పేర్కొంది. ఈ భేటీలో యుద్ధానంతర వ్యూహాలపై చర్చించే అవకాశం ఉంది.
గత ఫిబ్రవరి 28న ఇరాన్పై అమెరికా-ఇజ్రాయెల్ ఉమ్మడిగా చేపట్టిన దాడులతో ఈ యుద్ధం ప్రారంభమైంది. దీనికి ప్రతిచర్యగా టెహ్రాన్ సైతం ఇజ్రాయెల్తో పాటు అమెరికా సైనిక స్థావరాలున్న గల్ఫ్ దేశాలపై ప్రతిదాడులు చేసింది. ఈ పోరులో వేలాది మంది ప్రాణాలు కోల్పోగా, తీవ్ర ఇంధన సంక్షోభం తలెత్తింది. పెరిగిన చమురు ధరలు రాబోయే యు.ఎస్. మధ్యంతర ఎన్నికలపై ప్రభావం చూపుతున్న నేపథ్యంలో యుద్ధానికి ముగింపు పలికే దిశగా అమెరికా అడుగులు వేస్తున్నట్లు విశ్లేషకులు భావిస్తున్నారు.
