అమెరికా, ఇరాన్ దాడులతో మళ్లీ తీవ్రమైన యుద్ధం

జోర్డాన్‌లోని యూఎస్ స్థావరంపై క్షిపణుల వర్షం
దుబాయ్: పశ్చిమాసియాలో గత ఆరు నెలలుగా సాగుతున్న సైనిక ఘర్షణలు మరోసారి తీవ్రరూపం దాల్చాయి. తమ ఐదు చమురు ట్యాంకర్లను అమెరికా ధ్వంసం చేయడంతో ప్రతీకారంగా జోర్డాన్‌లోని అమెరికా సైనిక స్థావరంపై ఇరాన్ రివల్యూషనరీ గార్డ్స్ (IRGC) బాలిస్టిక్ క్షిపణులతో విరుచుకుపడింది. దీంతో పాటు హోర్ముజ్ జలసంధి పరిసరాల్లో రెండు అమెరికా నౌకలు, ఎనిమిది చమురు ట్యాంకర్లతో సహా మొత్తం 10 వాణిజ్య నౌకలపై దాడి చేసినట్లు ఇరాన్ ప్రకటించింది.

అమెరికా నావికాదళ యుద్ధనౌకపై ఇరాన్ జరిపిన క్షిపణి దాడులకు ప్రతిస్పందనగా, యూఎస్ సెంట్రల్ కమాండ్ ఐదు ఇరాన్ ట్యాంకర్లను ముంచివేస్తున్న దృశ్యాలను విడుదల చేసింది. దీనికి బదులుగా ఇరాన్, జోర్డాన్‌లోని అల్ అజ్రాక్ సమీపంలో ఉన్న యూఎస్ స్థావరంపై 20 బాలిస్టిక్ క్షిపణులను ప్రయోగించింది. అయితే వాటిలో 18 క్షిపణులను తమ వైమానిక రక్షణ వ్యవస్థలు అడ్డుకున్నాయని, ఎలాంటి ప్రాణనష్టం జరగలేదని జోర్డాన్, అమెరికా అధికారులు స్పష్టం చేశారు.

మరోవైపు సౌదీ అరేబియాలోని చమురు కేంద్రాలు, వైమానిక స్థావరాలపై ఇరాన్ మద్దతుగల హౌతీ తిరుగుబాటుదారులు డ్రోన్లు, క్షిపణులతో దాడులు చేయడంతో 73 మంది గాయపడ్డారు. ఈ వరుస దాడులు, సముద్ర మార్గాల్లో దిగ్బంధనాల నేపథ్యంలో ప్రపంచ చమురు సరఫరాపై ఆందోళనలు పెరిగిపోవడంతో బ్రెంట్ క్రూడ్ ఆయిల్ ధర బ్యారెల్‌కు $100 సమీపానికి చేరింది.