తెలుగు రాష్ట్రాలకు కేబినెట్ తీపి కబురు

రూ. 10,021 కోట్లతో 5 రైల్వే మల్టీట్రాకింగ్ ప్రాజెక్టులకు ఆమోదం
న్యూఢిల్లీ: దక్షిణాదిలో రైల్వే మౌలిక సదుపాయాలను మరింత బలోపేతం చేసేందుకు కేంద్ర ప్రభుత్వం కీలక నిర్ణయం తీసుకుంది. ప్రధానమంత్రి నరేంద్ర మోదీ అధ్యక్షతన జరిగిన ఆర్థిక వ్యవహారాల కేబినెట్ కమిటీ (CCEA) రూ. 10,021 కోట్ల అంచనా వ్యయంతో కూడిన ఐదు ప్రధాన రైల్వే మల్టీట్రాకింగ్ ప్రాజెక్టులకు ఆమోదం తెలిపింది. ఈ ప్రాజెక్టుల ద్వారా తెలంగాణ, ఆంధ్రప్రదేశ్, తమిళనాడు, కర్ణాటక రాష్ట్రాల్లోని 17 జిల్లాల్లో దాదాపు 540 కిలోమీటర్ల మేర అదనపు రైల్వే లైన్లు అందుబాటులోకి రానున్నాయి.

ఆమోదం పొందిన ప్రధాన రైల్వే మార్గాలు

సికింద్రాబాద్ (ఘట్‌కేసర్) - కాజీపేట: 110 కి.మీ. మేర మల్టీట్రాకింగ్ పనులు.
అరక్కోణం - రేణిగుంట: 77 కి.మీ. మేర 3వ, 4వ లైన్ల నిర్మాణం.
వైట్‌ఫీల్డ్ - బంగారపేట: 47 కి.మీ. మేర 3వ, 4వ లైన్ల నిర్మాణం.
హోసూర్ - ఓమలూర్: 147 కి.మీ. డబ్లింగ్ పనులు.
సేలం - కరూర్ - దిండిగల్: 159 కి.మీ. డబ్లింగ్ పనులు.

‘పీఎం గతిశక్తి’ జాతీయ మాస్టర్ ప్లాన్ కింద రూపొందించిన ఈ ప్రాజెక్టులు అందుబాటులోకి వస్తే కీలక మార్గాల్లో రైళ్ల రద్దీ తగ్గి, ప్రయాణికులకు రవాణా సౌలభ్యం పెరుగుతుంది. దాదాపు 52 లక్షల జనాభా ఉన్న 2,121 గ్రామాలకు రైలు అనుసంధానం మెరుగుపడనుంది. యాదగిరిగుట్ట, తిరుపతి, తిరుచానూరు, భోంగీర్ కోట వంటి ఆధ్యాత్మిక, పర్యాటక ప్రాంతాలకు కనెక్టివిటీ పెరుగుతుంది.

అంతేకాకుండా, ఏటా 47 మిలియన్ టన్నుల (MTPA) అదనపు సరుకు రవాణాకు వీలు కలగడంతో పాటు, లాజిస్టిక్స్ ఖర్చులు తగ్గుతాయి. ఈ ప్రాజెక్టుల ద్వారా దాదాపు 8 కోట్ల లీటర్ల చమురు వినియోగం, 42 కోట్ల కిలోల కార్బన్ ఉద్గారాలు తగ్గి పర్యావరణానికి ఎంతో మేలు జరుగుతుందని కేంద్ర ప్రభుత్వం స్పష్టం చేసింది.