ట్రంప్కు కెనడా భారీ షాక్: ఏకంగా 600కి పైగా అమెరికన్ వస్తువులపై టారిఫ్స్ పెంపు
అమెరికా అధ్యక్షుడు డొనాల్డ్ ట్రంప్ అనుసరిస్తున్న దూకుడు విధానాలకు కెనడా గట్టిగా బదులిచ్చింది. తమ దేశం నుంచి దిగుమతి అయ్యే వస్తువులపై అమెరికా భారీగా సుంకాలు విధించడాన్ని తీవ్రంగా పరిగణించిన కెనడా ప్రభుత్వం, ప్రతీకార చర్యలకు దిగింది. ఇందులో భాగంగా అమెరికాకు చెందిన 600కి పైగా వస్తువులపై ఏకంగా 50 శాతం వరకు టారిఫ్స్ విధిస్తూ సంచలన నిర్ణయం తీసుకుంది.
అమెరికా నుంచి ఏటా దిగుమతి అయ్యే సుమారు 20 బిలియన్ డాలర్ల విలువైన ఉత్పత్తులను లక్ష్యంగా చేసుకుంటూ కెనడా ప్రభుత్వం ఈ నూతన టారిఫ్ కేటగిరీలను ప్రకటించింది. వస్తువుల స్వభావాన్ని బట్టి 15 శాతం నుండి 50 శాతం వరకు పన్ను వసూలు చేయనున్నట్లు స్పష్టం చేసింది. ఉక్కు, డైరీ ఉత్పత్తులు, గృహోపకరణాలు, వ్యవసాయ పరికరాలు, ఎలక్ట్రానిక్స్ వంటి ప్రధాన రంగాల వస్తువులు ఈ జాబితాలో ఉన్నాయి.
ఇప్పటివరకు ప్రతీ విషయానికి అమెరికాపై పూర్తిగా ఆధారపడే ధోరణికి స్వస్తి చెప్పాలని కెనడా ప్రధాని మార్క్ కార్నీ దేశీయ కంపెనీలకు మరియు వినియోగదారులకు పిలుపునిచ్చారు. అమెరికా మాత్రం తమ ఉత్పత్తులను ఎలాంటి సుంకాలు లేకుండా లోపలికి రానిస్తూ, తమ దేశ ఎగుమతులపై మాత్రం భారీగా పన్నులు బాదడాన్ని సహించేది లేదని ఆయన తేల్చిచెప్పారు. గడచిన నెలలో కెనడా గూడ్స్పై ట్రంప్ సుంకాలు విధించడంతో భగ్గుమన్న ఈ వాణిజ్య సమరం (ట్రేడ్ వార్) ప్రస్తుతం ఇరు దేశాల మధ్య మరింత ముదిరింది.
