మ్యాట్రీమోనీ మోసాలు.. ఇలాంటి వారికి డబ్బులు ఇస్తే నిండా మునిగినట్టే!
పిల్లల పెళ్లి ఘనంగా చేయాలని, మంచి సంబంధం కుదరాలని కలలు కనే తల్లిదండ్రుల బలహీనతను ఆసరాగా చేసుకుని సైబర్ నేరగాళ్లు సరికొత్త మోసాలకు తెరలేపుతున్నారు. తమది ప్రముఖ మ్యాట్రీమోనీ సంస్థ అంటూ నమ్మిస్తూ, భారీ వేతనం ఉన్న ఎన్ఆర్ఐ, డాక్టర్ లేదా సాఫ్ట్వేర్ ఇంజినీర్ అబ్బాయిలంటూ ఆకర్షణీయమైన ఫొటోలు, ప్రొఫైళ్లను వాట్సాప్ ద్వారా పంపుతున్నారు. అబ్బాయి నచ్చాడని చెప్పగానే అసలు ఆట మొదలుపెట్టే ఈ కేటుగాళ్లు.. రిజిస్ట్రేషన్ మరియు అబ్బాయి తల్లిదండ్రుల నంబర్ ఇవ్వడం కోసం అంటూ రూ.5 వేల నుంచి రూ.10 వేల వరకు అడ్వాన్స్ డిమాండ్ చేస్తున్నారు. అమాయక తల్లిదండ్రులు పెళ్లి సంబంధం కుదురుతుందన్న ఆశతో ఆ డబ్బులు పంపగానే, ఆ నంబర్లు స్విచ్ఆఫ్ చేయడం లేదా పూర్తిగా అందుబాటులోకి రాకుండా మోసాలకు పాల్పడుతున్నారు.
ఇలాంటి నకిలీ మాటలతో ఉమ్మడి నల్లగొండ, కరీంనగర్, నిజామాబాద్తో పాటు హైదరాబాద్ ప్రాంతాల్లోని ఎంతోమంది తల్లిదండ్రులు నిండా మునుగుతున్నారు. కేవలం రూ.5 వేలు లేదా రూ.10 వేల చిన్న మొత్తమే కావడంతో చాలామంది బాధితులు పరువు పోతుందనే భయంతోనూ, పోలీసులకు వెళ్తే ప్రయోజనం ఉండదనే ఉద్దేశంతోనూ ఫిర్యాదు చేసేందుకు ముందుకు రావడం లేదు. కానీ, ఇదే అదునుగా భావిస్తున్న సైబర్ నేరగాళ్లు వందల కొద్దీ కుటుంబాలను టార్గెట్ చేస్తూ భారీ ఎత్తున వసూళ్లకు పాల్పడుతున్నట్లు పోలీసుల విచారణలో వెల్లడవుతోంది. బాధితుల ఫిర్యాదులు తక్కువగా ఉన్నప్పటికీ, క్షేత్రస్థాయిలో ఈ తరహా ఆన్లైన్ మోసాల బాధితుల సంఖ్య రోజురోజుకూ గణనీయంగా పెరుగుతుండటం ఆందోళన కలిగిస్తోంది.
ఈ తరహా మోసాల బారిన పడకుండా ఉండాలంటే మ్యాట్రీమోనీ పేరుతో ఫోన్లు వచ్చే వారు చెప్పే మాటలను గుడ్డిగా నమ్మకూడదని సైబర్ నిపుణులు మరియు పోలీసులు గట్టిగా హెచ్చరిస్తున్నారు. సంస్థ పూర్తి వివరాలు, అధికారిక చిరునామాను క్షుణ్ణంగా పరిశీలించడంతో పాటు, గుర్తింపు లేని వ్యక్తిగత నంబర్లకు ఎట్టి పరిస్థితుల్లోనూ ఆన్లైన్ ద్వారా డబ్బులు జమ చేయకూడదని సూచిస్తున్నారు. ఒకవేళ ఎవరైనా అనుమానాస్పదంగా ప్రవర్తించినా లేదా మోసానికి గురైనా, వెంటనే సంబంధిత చాటింగ్ వివరాలు, ఫోన్ నంబర్లు, చెల్లింపు రసీదులతో సైబర్ పోలీసులను ఆశ్రయించి ఫిర్యాదు చేయాలని అధికారులు విజ్ఞప్తి చేస్తున్నారు.
