న్యూఢిల్లీలో విజయవంతంగా ముగిసిన 18వ 'బ్రిక్స్ ఐపీ' సమావేశం

నవీకరించిన మార్గదర్శకాలకు ఆమోదం
న్యూఢిల్లీ: బ్రిక్స్ (BRICS) దేశాల మేధో సంపత్తి (IP) కార్యాలయాల అధిపతుల 18వ సమావేశం న్యూఢిల్లీలో గురువారం ముగిసింది. సెప్టెంబర్ 1 నుండి 3 వరకు మూడు రోజుల పాటు జరిగిన ఈ సమావేశంలో సభ్య దేశాలు మేధో సంపత్తి రంగంలో బహుపాక్షిక సహకారాన్ని బలోపేతం చేయడానికి, ఆవిష్కరణలు మరియు సుస్థిర ఆర్థిక అభివృద్ధిని ప్రోత్సహించడానికి తమ నిబద్ధతను పునరుద్ఘాటించాయి.

భారతదేశ బ్రిక్స్ అధ్యక్షతన వాణిజ్య, పరిశ్రమల మంత్రిత్వ శాఖ పరిధిలోని 'డిపార్ట్‌మెంట్ ఫర్ ప్రమోషన్ ఆఫ్ ఇండస్ట్రీ అండ్ ఇంటర్నల్ ట్రేడ్' (DPIIT) ఈ సమావేశాన్ని నిర్వహించింది. “స్థితిస్థాపకత, ఆవిష్కరణ, సహకారం మరియు సుస్థిరత కోసం నిర్మాణం” అనే ప్రధాన ఇతివృత్తంతో చర్చలు సాగాయి.

ఫలిత-ఆధారిత సహకారాన్ని ప్రోత్సహించడం, సరిహద్దుల మధ్య ఆవిష్కరణలను సులభతరం చేయడం మరియు ప్రపంచ మేధో సంపత్తి ప్రమాణాలను మెరుగుపరచడం లక్ష్యంగా 'ఐపీ బ్రిక్స్' నవీకరించిన కార్యాచరణ మార్గదర్శకాలను ఆమోదించింది.

రష్యా, ఇరాన్, ఇథియోపియా దేశాల ప్రతినిధులు వర్చువల్‌గా హాజరుకాగా, ఇతర బ్రిక్స్ దేశాల ప్రతినిధులు ప్రత్యక్షంగా హాజరై మొత్తం 35 మంది సభ్యులు పాల్గొన్నారు. బ్రిక్స్ దేశాల ఉమ్మడి సాంస్కృతిక, మేధో వారసత్వంలో భాగమైన సాంప్రదాయ జ్ఞానాన్ని, సాంప్రదాయ వైద్య విధానాలను పరిరక్షించాల్సిన అవసరాన్ని ప్రతినిధులు నొక్కి చెప్పారు.

పేటెంట్ శోధన ఫలితాల మార్పిడిని సులభతరం చేయడం, కేసుల పెండింగ్‌ను తగ్గించడం మరియు పేటెంట్ పరీక్షల ప్రక్రియను వేగవంతం చేయడంపై జరుగుతున్న అధ్యయన పురోగతిని సమావేశం సమీక్షించింది. BRICS మార్కెట్లలో భౌగోళిక సూచికలు (GI) పొందిన ఉత్పత్తుల రక్షణ, వాణిజ్యీకరణను విస్తరించేందుకు పేటెంట్ విశ్లేషణలను కీలక సాధనాలుగా గుర్తించారు.

సంస్థాగత సహకారాన్ని పెంచేందుకు BRICS మేధో సంపత్తి అవగాహన సిరీస్, IP BRICS ఫిన్‌టెక్ ఇన్నోవేషన్ మానిటర్, పారిశ్రామిక ఆస్తి వాణిజ్యీకరణ ఫోరమ్, ఉత్తమ పద్ధతుల రిపోజిటరీతో పాటు ప్రజారోగ్య విధానాలు, డిజైన్ వ్యవస్థలపై పరిశోధనల వంటి పలు నూతన కార్యక్రమాలపై కీలక చర్చలు జరిగాయి.

2026లో భారత్ బ్రిక్స్ అధ్యక్షత వహిస్తున్న తరుణంలో ఈ వార్షిక ఐపీ సమావేశాన్ని సమర్థవంతంగా నిర్వహించడం గ్లోబల్ ఐపీ పర్యావరణ వ్యవస్థలో దేశం యొక్క పెరుగుతున్న ప్రాధాన్యతకు అద్దం పడుతోందని ప్రతినిధులు కొనియాడారు.