గ్రామీణ విద్యార్థులకు డిజిటల్ విద్య

రాజస్థాన్‌లోని బారన్‌లో ‘మిషన్ సమర్థ్య’ స్మార్ట్ లెర్నింగ్
బారన్ (రాజస్థాన్): పేద, గ్రామీణ విద్యార్థులు దూర ప్రాంతాలలోని కోచింగ్ హబ్‌లకు వెళ్లాల్సిన అవసరం లేకుండా, తమ సొంత ఊరిలోనే నాణ్యమైన విద్యను అందించే లక్ష్యంతో రాజస్థాన్‌లోని బారన్ జిల్లా యంత్రాంగం సరికొత్త విప్లవానికి శ్రీకారం చుట్టింది. నేషనల్ థర్మల్ పవర్ కార్పొరేషన్ (NTPC) సహకారంతో 'మిషన్ సమర్థ్య-సమర్థ్ యువ' పేరుతో ప్రభుత్వ పాఠశాలల్లో స్మార్ట్ లెర్నింగ్ విధానాన్ని అందుబాటులోకి తీసుకువచ్చారు.

బారన్ జిల్లా కలెక్టర్ బాల్‌ముకుంద్ అసవా నేతృత్వంలో ప్రారంభమైన ఈ కార్యక్రమం ద్వారా గ్రామీణ ప్రాంత విద్యార్థులకు పట్టణ స్థాయి విద్యా మౌలిక సదుపాయాలు, నిపుణుల మార్గదర్శకత్వం నేరుగా లభిస్తున్నాయి. జిల్లాలోని ఎనిమిది బ్లాక్‌లలో ఉన్న 12 సీనియర్ సెకండరీ పాఠశాలలను సమర్థ్య కేంద్రాలుగా ఎంపిక చేయగా, అందులో 11 పాఠశాలలు ఆగస్టు 15 నుండి క్రమం తప్పకుండా డిజిటల్ తరగతులు నిర్వహిస్తున్నాయి.

ప్రభుత్వ బాలికల పాఠశాలలో ఏర్పాటు చేసిన సెంట్రల్ కంట్రోల్ రూమ్ నుండి నిపుణులైన అధ్యాపకులు మిగిలిన పాఠశాలలన్నింటికీ ఒకేసారి ప్రత్యక్ష (లైవ్) ఉపన్యాసాలు ఇస్తారు. తమ కార్పొరేట్ సామాజిక బాధ్యత (CSR) కింద ఎన్‌టిపిసి ఈ ప్రాజెక్టుకు అవసరమైన హై-స్పీడ్ ఇంటర్నెట్, పవర్ బ్యాకప్, లీజ్డ్ లైన్లు మరియు వీడియో కాన్ఫరెన్సింగ్ పరికరాలను సమకూర్చింది. గణితం, సైన్స్ వంటి కీలక సబ్జెక్టులలో ప్రాంతీయ అధ్యాపకుల కొరతను తీర్చడానికి ఈ లైవ్ డిజిటల్ వ్యవస్థ ఉపయోగపడుతోంది. వీటితో పాటు జనరల్ స్టడీస్, ఇంగ్లీష్ స్పీకింగ్, ఇంగ్లీష్ గ్రామర్ మరియు కెరీర్ కౌన్సెలింగ్ సెషన్‌లను నిర్వహిస్తున్నారు.

ప్రతిరోజూ 45 నిమిషాల చొప్పున రెండు తరగతులు నడుస్తున్నాయి. ప్రస్తుతం 11 కేంద్రాల్లో దాదాపు 500 మంది విద్యార్థులు విద్యనభ్యసిస్తున్నారు. పోటీ పరీక్షలకు సిద్ధమయ్యేలా 10, 11, 12 తరగతుల బాలికలకు ప్రాధాన్యతనిస్తున్నారు. గ్రామీణ ప్రాంత విద్యార్థులకు ఉన్నత విద్య, ఉద్యోగ అవకాశాలపై సరైన మార్గదర్శకత్వం అందిస్తూ సమాన అవకాశాలు కల్పించడమే ఈ 'మిషన్ సమర్థ్య' ప్రధాన ఉద్దేశమని జిల్లా కలెక్టర్ తెలిపారు.