అమెరికా వీసాలపై ట్రంప్ ప్రభుత్వం సడన్ షాక్

ప్రపంచవ్యాప్తంగా అపాయింట్‌మెంట్లు రద్దు!
వాషింగ్టన్:అమెరికా వీసాల కోసం నిరీక్షిస్తున్న అభ్యర్థులకు డొనాల్డ్ ట్రంప్ ప్రభుత్వం సడన్ షాక్ ఇచ్చింది. ప్రపంచవ్యాప్తంగా ఉన్న అమెరికా ఎంబసీలు మరియు కాన్సులేట్‌లలో వీసా అపాయింట్‌మెంట్లను తాత్కాలికంగా నిలిపివేసింది. ఇప్పటికే షెడ్యూల్ అయిన పలు ఇంటర్వ్యూలను రద్దు చేయడమే కాకుండా, వాటిని ఆ తర్వాత తేదీలకు రీషెడ్యూల్ చేస్తున్నట్లు దరఖాస్తుదారులకు ఇమెయిల్‌ల ద్వారా సమాచారం అందించింది. అంతర్జాతీయ మీడియా కథనాల ప్రకారం, ఈ నిర్ణయం వల్ల వేలాది మంది వీసా అభ్యర్థులు తీవ్ర ఆందోళనకు గురవుతున్నారు.

ప్రపంచవ్యాప్తంగా తమ ఎంబసీలు మరియు కాన్సులేట్‌లలో ఉన్న కాన్సులర్ అధికారులకు ఒక ప్రత్యేకమైన శిక్షణా కార్యక్రమం (Global Training Initiative) ప్రారంభించినట్లు విదేశాంగ శాఖ తెలిపింది. అమెరికాకు వచ్చే దరఖాస్తుదారులు అక్కడ ప్రభుత్వ నిధులపై ఆధారపడకుండా (Public Charge) ఉండేలా, ప్రొఫైళ్లను మరింత క్షుణ్ణంగా పరిశీలించేందుకే అధికారులకు ఈ కఠిన శిక్షణ ఇస్తున్నట్లు వెల్లడించింది.

ఈ సమగ్ర శిక్షణ పూర్తయ్యే వరకు వీసా సేవలు, అపాయింట్‌మెంట్ల వేళలను సర్దుబాటు చేస్తున్నామని అమెరికా ప్రభుత్వం పేర్కొంది.ఇది అమెరికాలో ఇమ్మిగ్రేషన్ విధానాలను మరింత కఠినతరం చేసేందుకు ట్రంప్ ప్రభుత్వం చేపడుతున్న చర్యల్లో భాగంగానే భావిస్తున్నారు.