మానవ వినాశనానికి ఏఐ దారితీయవచ్చు

ఆంత్రోపిక్ పరిశోధకుల హెచ్చరికలతో అమెరికాలో కలకలం
వాషింగ్టన్: ఆర్టిఫిషియల్ ఇంటెలిజెన్స్ (ఏఐ) వేగంగా అభివృద్ధి చెంది సమీప భవిష్యత్తులోనే మానవ జాతి వినాశనానికి దారితీయవచ్చని ఆంత్రోపిక్ సంస్థకు చెందిన పరిశోధకులు తీవ్ర హెచ్చరికలు చేశారు. ఈ దశాబ్దం చివరి నాటికి ఏఐ వల్ల మానవాళికి విపత్కర ప్రమాదం వాటిల్లే అవకాశం 10 శాతం కంటే ఎక్కువే ఉందని, ఏఐని నిర్మిస్తున్న వారు కూడా దీనిని నమ్ముతున్నారని మాజీ పరిశోధకుడు జాకబ్ కాక్సన్, శాస్త్రవేత్త ఇవాన్ హుబింగర్ స్పష్టం చేశారు. ఈ హెచ్చరికలతో ఏఐ వ్యవస్థలను నియంత్రించేందుకు కఠినమైన చట్టాలు తీసుకురావాలని అమెరికా ప్రజాప్రతినిధులు గళం విప్పుతున్నారు.

డెమొక్రాట్, రిపబ్లికన్ పార్టీలకు చెందిన ప్రజాప్రతినిధులు ఏఐ వల్ల కలిగే విపత్తులను అరికట్టేందుకు వాషింగ్టన్ తక్షణమే స్పందించాలని పిలుపునిచ్చారు. ఏఐ ఉత్పత్తుల భద్రతను నిర్ధారించడానికి ప్రభుత్వం మరియు స్వతంత్ర థర్డ్-పార్టీ ఆడిటర్ల ద్వారా తనిఖీలను తప్పనిసరి చేసే దిశగా చట్ట రూపకల్పన ప్రక్రియ వేగవంతమైంది. ఇప్పటికే కాలిఫోర్నియా రాష్ట్రం ఏఐ ఉత్పత్తుల స్వతంత్ర మూల్యాంకనానికి సంబంధించిన బిల్లును ఆమోదించింది. మరోవైపు ఓపెన్‌ఏఐ వంటి దిగ్గజ సంస్థలు కూడా కొన్ని మోడళ్ల అభివృద్ధి వేగాన్ని తగ్గిస్తున్నట్లు, జాతీయ భద్రతా నియమాల కోసం మద్దతు ఇస్తున్నట్లు ప్రకటించాయి.

అయితే, ఏఐ వల్ల మానవ వినాశనం జరుగుతుందనే ఆందోళన తనకు లేదని అమెరికా అధ్యక్షుడు డొనాల్డ్ ట్రంప్ వ్యాఖ్యానించారు. చైనా కంటే ఏఐ రంగంలో అమెరికా ముందంజలో ఉండటమే అత్యంత కీలకమని, పూర్తి స్థాయిలో నియంత్రణలు విధిస్తే సాంకేతిక పురోగతి దెబ్బతింటుందని ఆయన అభిప్రాయపడ్డారు. అయినప్పటికీ, డీప్‌మైండ్, ఆంత్రోపిక్ వంటి ప్రముఖ సంస్థల నుండి భద్రతా నిపుణులు బయటకు వచ్చి హెచ్చరికలు చేస్తుండటంతో చట్టసభ సభ్యులపై ఒత్తిడి మరింత పెరుగుతోంది.