2027 ఆస్కార్స్ పోటీలో మరాఠీ చిత్రం ‘గొంధల్’

అధికారిక ఎంట్రీగా ఎంపిక చేసిన ఫిల్మ్ ఫెడరేషన్ ఆఫ్ ఇండియా!
ముంబై:2027 ఆస్కార్ అవార్డుల కోసం భారతదేశం తరపున అధికారిక ఎంట్రీగా మరాఠీ చిత్రం "గొంధల్" ఎంపికైంది. 99వ అకాడమీ అవార్డులలో 'ఉత్తమ అంతర్జాతీయ చలనచిత్రం' (Best International Feature) విభాగం కోసం పరిశీలించిన 33 చిత్రాల జాబితా నుండి ఈ సినిమాను ఎంపిక చేసినట్లు 'ఫిల్మ్ ఫెడరేషన్ ఆఫ్ ఇండియా' ఎంపిక కమిటీ చైర్మన్ పి. శేషాద్రి శుక్రవారం ముంబైలో వెల్లడించారు. 'శ్వాస్' (2005), 'హరిశ్చంద్రాచి ఫ్యాక్టరీ' (2009), 'కోర్ట్' (2015) చిత్రాల తర్వాత ఆస్కార్‌కు భారతదేశం తరపున పంపబడుతున్న నాలుగవ మరాఠీ చిత్రం 'గొంధల్'.

సంతోష్ దవఖర్ రచన, దర్శకత్వంలో రూపొందిన ఈ చిత్రం గ్రామీణ మహారాష్ట్ర నేపథ్యంలోని ఒక సాంప్రదాయ ఆచారం చుట్టూ సాగుతుంది. అణచివేతతో కూడిన వైవాహిక బంధంలో చిక్కుకున్న సుమన్ అనే మహిళ కథను, భక్తి మరియు విధి మధ్య ఉన్న సన్నని గీతను ఆవిష్కరిస్తూ ఈ చిత్రాన్ని తెరకెక్కించారు. ఈ చిత్రంలో ఇషితా దేశ్‌ముఖ్ ప్రధాన పాత్ర పోషించగా కిషోర్ కదం, యోగేష్ సోహని తదితరులు ముఖ్య పాత్రల్లో నటించారు. ప్రముఖ సంగీత దర్శకుడు ఇళయరాజా ఈ చిత్రానికి సంగీతాన్ని అందించడం విశేషం.

ఈ ఏడాది ఆస్కార్ రేసులో 'గొంధల్'తో పాటు 'అంగ్', 'ఇక్కిస్', ఆదిత్య ధర్ రూపొందించిన 'ధురంధర్', సన్నీ డియోల్ నటించిన 'బోర్డర్ 2', రామ్ చరణ్ నటించిన 'పెద్ది' వంటి అనేక భారీ చిత్రాలు పోటీ పడ్డాయి. అయితే భారతీయ సంస్కృతిని, జీవన విధానాన్ని ప్రతిబింబించే తీరు, నటీనటుల ప్రతిభ, సంగీతం మరియు మేకింగ్ ప్రమాణాల పరంగా 'గొంధల్' అగ్రస్థానంలో నిలిచిందని ఎంపిక కమిటీ తెలిపింది. 2025 గోవా ఐఎఫ్ఎఫ్ఐ (IFFI) 'ఇండియన్ పనోరమా' విభాగంలో ప్రదర్శితమైన ఈ చిత్రానికి సంతోష్ దవఖర్ 'సిల్వర్ పీకాక్' ఉత్తమ దర్శకుడి అవార్డును కూడా గెలుచుకున్నారు.

తన చిత్రం దేశానికి ప్రాతినిధ్యం వహించడం ఎంతో గర్వకారణమని ఐఐఎం, ఎఫ్‌టిఐఐ పూర్వ విద్యార్థి అయిన దర్శకుడు సంతోష్ దవఖర్ ఆనందం వ్యక్తం చేశారు. రాబోయే ఆరు నెలల పాటు ఆస్కార్ వేదికపై ప్రచారం నిర్వహించేందుకు ప్రత్యేక ప్రణాళిక సిద్ధం చేసినట్లు ఆయన తెలిపారు. 99వ ఆస్కార్ పురస్కారాల వేడుక ఆదివారం, మార్చి 14, 2027న జరగనుంది.