ప్రభుత్వ కీలక పథకాలతో నిరుద్యోగ రేటు 3.2 శాతానికి తగ్గింది

కేంద్ర సహాయ మంత్రి ఎల్. మురుగన్
చెన్నై: ప్రభుత్వం చేపట్టిన వివిధ సంక్షేమ, అభివృద్ధి కార్యక్రమాల ఫలితంగా దేశంలో నిరుద్యోగ రేటు 6 శాతం నుండి 3.2 శాతానికి తగ్గిందని కేంద్ర సహాయ మంత్రి డాక్టర్ ఎల్. మురుగన్ శనివారం వెల్లడించారు. చెన్నైలోని డి.జి. వైష్ణవ్ కళాశాలలో జరిగిన 20వ 'రోజ్‌గార్ మేళా'లో ఆయన పాల్గొని మాట్లాడారు. 'మేక్ ఇన్ ఇండియా', 'స్టార్టప్ ఇండియా', 'స్టాండప్ ఇండియా', 'ముద్రా' వంటి పథకాలు యువతకు ఉపాధితో పాటు పారిశ్రామికవేత్తలుగా ఎదిగేందుకు ఎంతో దోహదపడ్డాయని ఆయన పేర్కొన్నారు.

ఈ కార్యక్రమంలో ప్రధానమంత్రి నరేంద్ర మోదీ వీడియో కాన్ఫరెన్సింగ్ ద్వారా పాల్గొని దేశవ్యాప్తంగా 45 ప్రాంతాల్లో ఎంపికైన 51,000 మందికి పైగా యువతకు నియామక పత్రాలను అందజేశారు. చెన్నై వేదికగా వివిధ కేంద్ర ప్రభుత్వ మంత్రిత్వ శాఖలు, విభాగాలకు ఎంపికైన 285 మంది అభ్యర్థులకు కేంద్ర మంత్రి మురుగన్ స్వయంగా నియామక పత్రాలను పంపిణీ చేశారు. ఆదాయపు పన్ను శాఖ, రక్షణ, తపాలా, దక్షిణ రైల్వే, ఈఎస్‌ఐసీ, జిప్‌మర్ వంటి సంస్థల్లో వీరు నియమితులయ్యారు.

2047 నాటికి 'వికసిత్ భారత్' లక్ష్య సాధనలో కొత్తగా నియమితులైన యువత కీలక పాత్ర పోషిస్తారని కేంద్ర మంత్రి ఆకాంక్షించారు. ఉద్యోగాన్ని కేవలం ఒక ఉపాధిగానే కాకుండా దేశ సేవ చేసే అవకాశంగా భావించాలని, నిజాయితీ, జవాబుదారీతనం, సానుభూతితో ప్రజలకు సేవ అందించాలని సూచించారు. దేశంలో స్టార్టప్‌ల సంఖ్య 2014లో 400 నుండి ప్రస్తుతం 2.5 లక్షలకు పైగా పెరిగిందని, ఇందులో మెజారిటీ వ్యవస్థాపకులు 30 ఏళ్ల లోపు వారేనని తెలిపారు.

ప్రజా పరిపాలన, అంతరిక్షం, రక్షణ వంటి అత్యాధునిక రంగాలలో మహిళల భాగస్వామ్యం నిరంతరం పెరుగుతోందని మంత్రి సంతోషం వ్యక్తం చేశారు. ఇప్పటివరకు రోజ్‌గార్ మేళాల ద్వారా దేశవ్యాప్తంగా 12.75 లక్షలకు పైగా నియామక పత్రాలను అందించినట్లు వెల్లడించారు. అనంతరం మీడియాతో మాట్లాడుతూ, తమిళనాడులోని నవోదయ పాఠశాలలు పేద, బలహీన వర్గాల విద్యార్థులకు మాతృభాషలోనే నాణ్యమైన విద్యను అందిస్తాయని స్పష్టం చేశారు.