భారత్ ఆర్థిక, సాంకేతిక, భౌగోళిక రాజకీయ శక్తి కేంద్రం

బెల్జియం ప్రధాని బార్ట్ డి వెవర్
న్యూఢిల్లీ: గత రెండు దశాబ్దాలలో ప్రపంచ వేదికపై భారత్ ప్రభావం గణనీయంగా పెరిగిందని, దేశం ఒక ప్రధాన ఆర్థిక, సాంకేతిక మరియు భౌగోళిక రాజకీయ శక్తిగా ఎదిగిందని బెల్జియం ప్రధాని బార్ట్ డి వెవర్ కొనియాడారు. భారత పర్యటనలో భాగంగా ప్రధాన మంత్రి నరేంద్ర మోదీతో ద్వైపాక్షిక చర్చలు జరిపిన అనంతరం ఆయన సంయుక్త విలేకరుల సమావేశంలో మాట్లాడారు. గత 20 ఏళ్లలో బెల్జియం ప్రధాని ఒకరు భారత్‌లో పర్యటించడం ఇదే తొలిసారి కావడం గమనార్హం.

నేపాల్ ఆకస్మిక వరదల్లో ప్రాణాలు కోల్పోయిన భారత పౌరుల కుటుంబాలకు బెల్జియం ప్రధాని సానుభూతి తెలిపారు. ప్రధాని మోదీతో జరిపిన చర్చల్లో 'విస్తృత భద్రతా భావన' ప్రధాన అంశంగా నిలిచిందని ఆయన పేర్కొన్నారు. ఇరు దేశాల సాయుధ దళాలు, రక్షణ పరిశ్రమల మధ్య సహకారం, సైనిక మార్పిడి, ఉమ్మడి పరిశోధన, ఆవిష్కరణలు, ఉమ్మడి అభివృద్ధి మరియు ఉమ్మడి ఉత్పత్తికి ప్రాధాన్యమిస్తూ 'అభిప్రాయ వ్యక్తీకరణ లేఖ' (Letter of Intent) మార్పిడి చేసుకున్నట్లు వెల్లడించారు.

భారత్-యూరోపియన్ యూనియన్ స్వేచ్ఛా వాణిజ్య ఒప్పందం (FTA) ఖరారు కావడంపై డి వెవర్ తీవ్ర హర్షం వ్యక్తం చేశారు. ఇది ఇరు ప్రాంతాల వ్యాపార సంస్థలు, పౌరులకు నేరుగా ప్రయోజనం చేకూరుస్తుందని, పెట్టుబడులను ప్రోత్సహించి మార్కెట్ ప్రాప్యతను మెరుగుపరుస్తుందని అన్నారు.

2026 నాటి చివరి నాటికి బెల్జియం వేదికగా ఈ ఒప్పందంపై లాంఛనంగా సంతకాలు జరగాలని ఆకాంక్షిస్తూ, డిసెంబర్‌లో ప్రధాని మోదీ బ్రస్సెల్స్ పర్యటనపై ఆసక్తిని వ్యక్తం చేశారు. భారత్-బెల్జియం దేశాలు శతాబ్దాల నాటి చారిత్రక బంధాన్ని పంచుకుంటున్నాయని, రెండు దేశాల సంబంధాలలో ‘అత్యుత్తమ దశ’ మున్ముందు రాబోతోందని బార్ట్ డి వెవర్ విశ్వాసం వ్యక్తం చేశారు.