81వ ఐరాస సర్వసభ్య సమావేశానికి న్యూయార్క్ చేరుకున్న విదేశాంగ మంత్రి జైశంకర్

న్యూయార్క్: ఐక్యరాజ్యసమితి సర్వసభ్య సమావేశం (UNGA) 81వ సదస్సులో పాల్గొనేందుకు భారత విదేశాంగ మంత్రి డాక్టర్ ఎస్. జైశంకర్ ఆదివారం న్యూయార్క్‌కు చేరుకున్నారు. విదేశాంగ మంత్రిత్వ శాఖ (MEA) వెల్లడించిన వివరాల ప్రకారం.. ఐరాస ఉన్నత స్థాయి వారంలో పాల్గొనే భారత ప్రతినిధి బృందానికి జైశంకర్ నాయకత్వం వహించనున్నారు.

సెప్టెంబర్ 26న జరగనున్న ఐరాస సర్వసభ్య సమావేశంలో విదేశాంగ మంత్రి భారత్ తరఫున ప్రసంగించనున్నారు. ఈ పర్యటనలో భాగంగా ఆయన పలు దేశాల విదేశాంగ మంత్రులతో ద్వైపాక్షిక చర్చలు జరపడంతో పాటు బహుళపక్ష సమావేశాల్లోనూ పాల్గొననున్నారు.

న్యూయార్క్ పర్యటనకు వెళ్లే మార్గంలో జైశంకర్ స్విట్జర్లాండ్‌లోని జ్యూరిచ్‌ను సందర్శించారు. అక్కడ స్విట్జర్లాండ్, లీచ్‌టెన్‌స్టైన్‌లకు భారత రాయబారి అయిన మృదుల్ కుమార్ ఆయనకు ఘన స్వాగతం పలికారు. ఈ సందర్భంగా ఆయా దేశాలతో భారత్‌కు ఉన్న ద్వైపాక్షిక సంబంధాలు, తాజా రాజకీయ పరిణామాలపై రాయబారి విదేశాంగ మంత్రికి వివరించినట్లు భారత రాయబార కార్యాలయం తెలిపింది.