*డిఎస్పి వికారాబాద్ జిల్లా కన్వీనర్ రవీందర్ మహారాజ్ డిమాండ్
*డాక్టర్ విశారదన్ మహారాజ్ ప్రతిపాదనకు పూర్తి మద్దతు
*బహుజనుల ఆరాధ్య దైవాల పేరు పెట్టడమే సముచితం
వికారాబాద్ జిల్లా ప్రతినిధి, మేజర్ న్యూస్ (సెప్టెంబర్ 21):
వరంగల్లోని మామునూరు విమానాశ్రయానికి బహుజనుల ఆరాధ్య దైవాలైన "సమ్మక్క - సారలమ్మ"ల పేరు పెట్టాలని ధర్మ సమాజ్ పార్టీ (DSP) వికారాబాద్ జిల్లా కన్వీనర్ రవీందర్ మహారాజ్ డిమాండ్ చేశారు. ఎయిర్పోర్టుకు సముచితమైన పేరును సూచించాలని ముఖ్యమంత్రి రేవంత్ రెడ్డి కోరిన నేపథ్యంలో, డిఎస్పి రాష్ట్ర అధ్యక్షుడు డాక్టర్ విశారదన్ మహారాజ్ చేసిన ప్రతిపాదనకు ఆయన పూర్తి మద్దతు ప్రకటిస్తున్నట్లు తెలిపారు.ఈ సందర్భంగా ఆయన మాట్లాడుతూ..., తెలంగాణలో 90 శాతానికి పైగా ఉన్న అణగారిన, బహుజన వర్గాల ఆత్మగౌరవానికి సమ్మక్క-సారలమ్మలు ప్రతీకలని పేర్కొన్నారు. ఆసియాలోనే అతిపెద్ద గిరిజన జాతరగా పేరుగాంచిన వారి పేరును వరంగల్ విమానాశ్రయానికి పెట్టడమే అత్యంత సముచితమని అభిప్రాయపడ్డారు. ప్రచారంలో ఉన్న కాకతీయ లేదా రుద్రమదేవి పేర్లు కేవలం అగ్రకుల నామస్మరణను మాత్రమే గుర్తుచేస్తాయని, వాటిపై తమకు అభ్యంతరం ఉందని స్పష్టం చేశారు. ఒకవేళ వీరనారీమణులైన సమ్మక్క-సారలమ్మల పేరును పెట్టకపోతే, ఈ ప్రభుత్వం అణగారిన వర్గాలకు వ్యతిరేకమని భావించాల్సి వస్తుందని హెచ్చరించారు. సీఎం రేవంత్ రెడ్డి వెంటనే స్పందించి బహుజనుల ఆకాంక్షలకు అనుగుణంగా సానుకూల నిర్ణయం తీసుకోవాలని కోరారు.
