సారీ అండీ.. రాంగ్ నెంబర్'.. హనీట్రాప్ వలలో చిక్కుకుని రూ. 4 లక్షలు పోగొట్టుకున్న యువకుడు!

న్యూఢిల్లీ: ఫోన్ మోగగానే అవతలి వైపు వినిపించే మధురమైన గొంతు కొన్నిసార్లు జీవితాన్ని ఎలా తలకిందులు చేస్తుందో చెప్పడానికి ఈ ఘటనే ప్రత్యక్ష ఉదాహరణ. 'రాంగ్ నెంబర్' అంటూ మొదలైన ఒక అపరిచితురాలి పరిచయం.. ఆ యువకుడిని ఏకంగా సైబర్ నేరస్థుల వలలోకి నెట్టింది. తీపి మాటలతో బుట్టలో వేసుకున్న ఆ కిలాడీ లేడీ, ఆన్‌లైన్ హనీట్రాప్‌తో బాధితుడి నుంచి రూ. 4 లక్షలు గుంజి కటకటాలపాలైంది.

ఫోన్ కాల్‌తో మొదలైన వల:

ఉత్తరప్రదేశ్‌లోని బరేలీకి చెందిన ఒక యువకుడి సెల్‌ఫోన్‌కు అనుకోకుండా ఒక నంబర్ నుంచి ఫోన్ కాల్ వచ్చింది. ఫోన్ లిఫ్ట్ చేయగానే అవతలి వైపు నుంచి ఓ యువతి తియ్యని గొంతుతో పలకరించింది. ‘సారీ అండీ.. రాంగ్ నెంబర్’ అంటూ మొదలైన ఆ సంభాషణ అంతటితో ఆగలేదు. ఆ యువతి కావాలనే మాటలు కలుపుతూ రోజూ గంటల తరబడి ఫోన్‌లో మాట్లాడటం ప్రారంభించింది. ఆమె మాటల మాంత్రిగ్యానికి కరిగిపోయిన ఆ అమాయక కుర్రాడు క్రమేణా ఆమె ప్రేమ మైకంలో చిక్కుకుపోయాడు.

వీడియో కాల్ ట్రాప్.. ప్రైవేట్ వీడియో రికార్డింగ్:

ఇద్దరి మధ్య సాన్నిహిత్యం పెరిగిన తర్వాత, ఆ యువతి వీడియో కాల్ మాట్లాడాలని కోరింది. ఆమె ఉచ్చులో పడినట్లు గ్రహించని ఆ యువకుడు ఉత్సాహంగా వీడియో కాల్ ఆన్ చేశాడు. ఆ సమయంలో మాటల్లో రెచ్చిపోయిన కుర్రాడు.. కెమెరా ముందు తన బాడీని ప్రదర్శించాడు. అయితే, ఆ మాయలేడి చేస్తున్న కుట్ర ఏమిటో ఆ సమయంలో అతనికి అర్ధం కాలేదు. కెమెరా ముందు జరిగిన ఆ ప్రైవేట్ తంతు మొత్తాన్ని ఆ సైబర్ నేరస్థురాలు అత్యంత చాకచక్యంగా రికార్డ్ చేసింది.

బ్లాక్‌మెయిల్ పర్వం మొదలు:

వీడియో కాల్ కట్ అయిన క్షణాల వ్యవధిలోనే ఆ యువతి తన అసలు రూపం బయటపెట్టింది. రికార్డ్ చేసిన ఆ ప్రైవేట్ వీడియోను సోషల్ మీడియాలో వైరల్ చేస్తానంటూ బెదిరింపులకు దిగింది. పరువు పోతుందన్న భయంతో వణికిపోయిన ఆ యువకుడు ఆమె అడిగిన వెంటనే రూ. 2 లక్షలు అకౌంట్‌కు బదిలీ చేశాడు.

అయినా ఆ ఘరానా మహిళలో దురాశ చావలేదు. కొద్ది రోజులకే మళ్లీ ఫోన్ చేసి మరో రూ. 2 లక్షలు ఇవ్వాలని బ్లాక్‌మెయిల్ చేయడం మొదలుపెట్టింది. ఎంత ఇస్తున్నా ఆమె డిమాండ్లు అంతకంతకూ పెరుగుతుండటంతో విసిగిపోయిన బాధితుడికి ఆలస్యంగా జ్ఞానోదయం కలిగింది. పరువుపోతే పోయింది కానీ ఈ కిలాడీ చేతిలో మోసపోతే జీవితం నాశనమవుతుందని భావించిన ఆ యువకుడు, నేరుగా సైబర్ పోలీసులను ఆశ్రయించి ఫిర్యాదు చేశాడు.

అమృత్‌సర్‌లో నిందితురాలి అరెస్ట్:

బాధితుడి ఫిర్యాదు ఆధారంగా రంగంలోకి దిగిన సైబర్ క్రైమ్ పోలీసులు టెక్నికల్ ఆధారాలతో నిందితురాలి ఆచూకీ రాబట్టారు. పంజాబ్‌లోని అమృత్‌సర్‌లో తలదాచుకున్న ఆ హనీట్రాప్ కిలాడీని పోలీసులు అరెస్ట్ చేసి కటకటాల వెనక్కి నెట్టారు. సోషల్ మీడియాలో, ఫోన్లలో పరిచయం లేని వ్యక్తులతో అప్రమత్తంగా ఉండాలని, లేదంటే ఇలాంటి ఘోరమైన మోసాలకు బలైపోవాల్సి వస్తుందని ఈ ఘటనే మరోసారి హెచ్చరిస్తోంది.