ప్రాంతీయ స్థిరత్వం, శాంతికి భారత్-వియత్నాం కట్టుబాటు

సైనిక సహకారం, రక్షణ సంబంధాల బలోపేతంపై ఉన్నత స్థాయి చర్చలు
న్యూఢిల్లీ: ఇండో-పసిఫిక్ ప్రాంతంలో శాంతి, భద్రతలను పెంపొందించే దిశగా భారతదేశం, వియత్నాంలు తమ ఉమ్మడి నిబద్ధతను మరోసారి స్పష్టం చేశాయి. భారత్‌లో అధికారిక పర్యటనలో ఉన్న వియత్నాం పీపుల్స్ ఆర్మీ డిప్యూటీ చీఫ్ ఆఫ్ జనరల్ స్టాఫ్ లెఫ్టినెంట్ జనరల్ లీ వాన్ హుయోంగ్‌కు భారత సైన్యాధిపతి జనరల్ ధీరజ్ సేథ్ గురువారం ఘన స్వాగతం పలికారు.

సౌత్ బ్లాక్ వద్ద వియత్నాం సైనిక అధిపతికి లాంఛనప్రాయ గౌరవ వందనం సమర్పించిన అనంతరం, ఇరు దేశాల ఉన్నతాధికారులు ద్వైపాక్షిక రక్షణ సహకారం, సైనిక బంధాలను మరింత బలోపేతం చేసే అంశాలపై విస్తృతంగా చర్చించారు. ఈ సందర్భంగా న్యూఢిల్లీలోని జాతీయ యుద్ధ స్మారక చిహ్నాన్ని దర్శించిన లెఫ్టినెంట్ జనరల్ లీ వాన్ హుయోంగ్, అమరవీరులైన భారత సైనికులకు నివాళులర్పించారు.

రెండు దేశాల మధ్య ఉన్న సమగ్ర వ్యూహాత్మక భాగస్వామ్యం కింద రక్షణ రంగ సంబంధాలను సరికొత్త ఎత్తుకు తీసుకెళ్లేందుకు ఈ భేటీ దోహదపడుతుందని భారత సైన్యం తెలిపింది. ఇటీవలే భారత వైమానిక దళాధిపతి ఎయిర్ చీఫ్ మార్షల్ ఏపీ సింగ్ వియత్నాం పర్యటనకు వెళ్లిన సమయంలో ఇరు దేశాల వైమానిక బలగాల మధ్య సహకారం, సామర్థ్య నిర్మాణంపై చర్చించిన సంగతి తెలిసిందే. ఆ పర్యటన కొనసాగింపుగా జరిగిన ఈ తాజా సమావేశం ఇరు దేశాల మధ్య ప్రాంతీయ, అంతర్జాతీయ భద్రతా సహకారాన్ని మరింత విస్తరింపజేస్తుందని అధికారులు వెల్లడించారు.