టైమ్స్ స్క్వేర్లో కత్తులతో వీరంగం
మహిళా నిందితురాలిని కాల్చి చంపిన న్యూయార్క్ పోలీసులు!
న్యూయార్క్: ప్రపంచ ప్రసిద్ధి చెందిన న్యూయార్క్ నగరంలోని టైమ్స్ స్క్వేర్లో సోమవారం మధ్యాహ్నం దారుణ సంఘటన చోటుచేసుకుంది. రెండు కత్తులతో విచక్షణారహితంగా దాడికి పాల్పడిన ఒక మహిళను న్యూయార్క్ పోలీస్ డిపార్ట్మెంట్ (NYPD) అధికారులు కాల్చి చంపారు. ఈ కత్తిపోట్ల ఘటనలో 32 ఏళ్ల మహిళ తీవ్రంగా గాయపడి ఆసుపత్రిలో మరణించగా, మరొక బాధితుడి పరిస్థితి ప్రస్తుతం నిలకడగా ఉంది.
20 సెకన్ల వ్యవధిలో దాడులు:
NYPD కమిషనర్ జెస్సికా టిష్ తెలిపిన వివరాల ప్రకారం, ఈ ఘటన వెస్ట్ 41వ వీధి మరియు సెవెంత్ అవెన్యూ సమీపంలో సాయంత్రం సుమారు 4:24 గంటల సమయంలో జరిగింది.
నిందితురాలు తన వద్ద ఉన్న ఎర్రటి బ్యాగ్ నుండి రెండు కత్తులను తీసి, రోడ్డు దాటేందుకు వేచి చూస్తున్న 68 ఏళ్ల వృద్ధుడి పొత్తికడుపులో పొడిచింది. ఎటువంటి రెచ్చగొట్టడం లేకుండానే ఈ దాడి జరిగింది.
ఆ తర్వాత సెవెంత్ అవెన్యూ వైపు వెళ్తూ కేవలం 20 సెకన్ల వ్యవధిలో 32 ఏళ్ల మహిళపై దాడికి తెగబడింది.
సమాచారం అందుకున్న వెంటనే రెస్పాండ్ అయిన పోలీసులు, కత్తులను కింద పడేయాలని నిందితురాలిని ఒప్పించేందుకు నాలుగు నిమిషాల పాటు చర్చలు జరిపారు. అయితే ఆ మహిళ "నేను ఆయుధాలు కింద పడేయను, మిమ్మల్ని చంపేస్తాను" అంటూ అధికారుల వైపు దూసుకొచ్చింది.
పోలీసులు వెంటనే టేజర్లు (Tasers) ప్రయోగించినప్పటికీ ఆమె ఆగకపోవడంతో, అధికారులు ఆత్మరక్షణార్థం కాల్పులు జరిపారు. గాయపడిన ముగ్గురినీ బెల్వ్యూ ఆసుపత్రికి తరలించగా, 32 ఏళ్ల బాధితురాలు మరియు నిందితురాలు మరణించినట్లు వైద్యులు ధ్రువీకరించారని న్యూయార్క్ మేయర్ జోహ్రాన్ మమ్దానీ వెల్లడించారు. సమయస్ఫూర్తితో వ్యవహరించి ముప్పు మరింత తీవ్రం కాకుండా అడ్డుకున్న అధికారులను మేయర్ ప్రశంసించారు.
