'ఇరాన్ వద్ద అణు ఆయుధం ఉండకూడదు'

అమెరికా అధ్యక్షుడు డొనాల్డ్ ట్రంప్ సంచలన వ్యాఖ్యలు
వాషింగ్టన్: ఇరాన్ వద్ద ఎట్టి పరిస్థితుల్లోనూ "అణు ఆయుధం ఉండకూడదు" అని అమెరికా అధ్యక్షుడు డొనాల్డ్ ట్రంప్ తన వైఖరిని మరోసారి గట్టిగా పునరుద్ఘాటించారు. ఫాక్స్ న్యూస్ "సండే నైట్ ఇన్ అమెరికా" కార్యక్రమంలో మాట్లాడిన ఆయన, ఇరాన్ వద్ద అణ్వాయుధం ఉంటే ఇజ్రాయెల్‌తో పాటు మధ్యప్రాచ్యం, ఐరోపా, చివరికి అమెరికాకు కూడా తీవ్ర ముప్పు ఎదురవుతుందని హెచ్చరించారు.

ఉగ్రవాదానికి అగ్రగామిగా మద్దతునిచ్చే ఇరాన్, భారీ విధ్వంసకర ఆయుధాలను పొందేందుకు అర్హత లేదని ట్రంప్ స్పష్టం చేశారు. ఇరాన్‌పై అమెరికా చేపట్టిన దాడులు, విధిస్తున్న ఆర్థిక ఆంక్షలు తీవ్ర ప్రభావాన్ని చూపుతున్నాయని ట్రంప్ పేర్కొన్నారు.

ఇరాన్ నావికాదళం, వైమానిక దళం, విమాన విధ్వంసక వ్యవస్థలతో (Anti-aircraft systems) పాటు కీలక నాయకత్వం పూర్తిగా తుడిచిపెట్టుకుపోయాయని ఆయన తెలిపారు. ఒకవేళ ఇరాన్ వద్ద అణ్వాయుధం ఉండి ఉంటే ఇజ్రాయెల్ కనుమరుగైపోయేదని, తాను అధ్యక్షుడిగా ఉండటం వల్లే అది సాధ్యపడలేదని పేర్కొన్నారు. ఇరాన్ దళాలు దేశంలో నిరసనకారులపై విచక్షణారహితంగా దాడులు చేస్తూ పదివేల మందిని పొట్టనబెట్టుకున్నాయని ఆరోపించారు.

ఈ పోరాటం ప్రారంభమైన నాటి నుంచి సౌదీ అరేబియా, ఖతార్, యూఏఈ, బహ్రెయిన్, కువైట్ వంటి గల్ఫ్ దేశాలను ఇరాన్ బెదిరించడం వల్ల, గతంలో తటస్థంగా ఉన్న దేశాల మద్దతును కూడా అది కోల్పోయిందని ట్రంప్ వివరించారు.

హోర్ముజ్ జలసంధి సమీపంలోని అత్యంత వ్యూహాత్మక లారాక్ ద్వీపంలో ఉన్న ఇరాన్ క్షిపణి ప్రయోగ కేంద్రాలపై అమెరికా ఇటీవల జరిపిన దాడుల నేపథ్యంలో ట్రంప్ వ్యాఖ్యలు ప్రాధాన్యం సంతరించుకున్నాయి. కాగా, అమెరికా చర్యలను వ్యూహాత్మక పొరపాటుగా అభివర్ణించిన ఇరాన్ ఐఆర్‌జీసీ (IRGC), ఈ దాడులకు తప్పకుండా శత్రుదేశం ఆర్థిక, సైనిక రంగాలలో భారీ మూల్యం చెల్లించుకోక తప్పదని తీవ్రంగా హెచ్చరించింది.