50మీ బ్యాక్స్ట్రోక్ ఫైనల్కు శ్రీహరి నటరాజ్
రేసు నుంచి తప్పుకున్న ఇతర ఈతగాళ్లు
టోక్యో:ఆసియా క్రీడలు 2026లో భారత స్టార్ స్విమ్మర్ శ్రీహరి నటరాజ్ పురుషుల 50మీ బ్యాక్స్ట్రోక్ ఫైనల్కు అర్హత సాధించాడు. సోమవారం జరిగిన హీట్స్లో అతను 25.37 సెకన్ల సమయంతో సంయుక్తంగా తొమ్మిదో స్థానంలో నిలిచి ఫైనల్ బెర్త్ను ఖరారు చేసుకున్నాడు. మరో భారత ఈతగాడు రిషబ్ దాస్ 25.41 సెకన్లతో 10వ స్థానంలో నిలిచి స్వల్ప తేడాతో ఫైనల్ అవకాశాన్ని కోల్పోయి, 'ఫస్ట్ రిజర్వ్'గా ఎంపికయ్యాడు.
మిగతా విభాగాల్లో భారత ఈతగాళ్లకు నిరాశే ఎదురైంది. పురుషుల 50మీ ఫ్రీస్టైల్లో ఆకాష్ మణి (23.43 సెకన్లు), హీర్ గితేష్ షా (23.57 సెకన్లు) వరుసగా 26, 28వ స్థానాలతో సరిపెట్టుకుని ఫైనల్కు చేరలేకపోయారు. అలాగే 100మీ బ్రెస్ట్స్ట్రోక్లో ధనుష్ సురేష్ (1:03.46) 22వ స్థానంలో నిలిచి వెనుదిరిగాడు. దక్షణ్ శశికుమార్, సాజన్ ప్రకాష్, అనీష్ సునీల్, వేదాంత్ మహాదేవన్లతో కూడిన 4x200మీ ఫ్రీస్టైల్ రిలే జట్టు కూడా ఫైనల్ బెర్త్ సాధించలేక 'ఫస్ట్ రిజర్వ్' స్థానానికే పరిమితమైంది.
జపాన్లో జరుగుతున్న ఈ క్రీడల్లో భారత స్విమ్మింగ్ బృందం 12 ఏళ్ల పతకాల నిరీక్షణకు ముగింపు పలకాలనే పట్టుదలతో ఉంది. 2014 ఇంచియాన్ ఆసియా క్రీడల్లో సందీప్ సెజ్వాల్ 50మీ బ్రెస్ట్స్ట్రోక్లో కాంస్యం సాధించిన తర్వాత భారత్కు ఈ విభాగంలో పతకం దక్కలేదు. ఒలింపియన్లు శ్రీహరి నటరాజ్, సాజన్ ప్రకాష్ల అనుభవంతో ఈసారి ఎలాగైనా పతకం సాధించాలని భారత్ భావిస్తోంది.
