సూర్య తెలంగాణ డెస్క్: రాష్ట్రవ్యాప్తంగా తీవ్ర చర్చనీయాంశంగా మారిన జన్వాడ ఫార్మ్ హౌస్ వివాదంపై దాని యజమాని ప్రదీప్ రెడ్డి స్పష్టతనిచ్చారు. జన్వాడ ఫార్మ్ హౌస్ ఉన్న భూమి పూర్తిగా తన సొంతమని, ఈ భూమితో బీఆర్ఎస్ వర్కింగ్ ప్రెసిడెంట్ కేటీఆర్కు ఎలాంటి సంబంధం లేదని ఆయన స్పష్టం చేశారు. రాజకీయ నాయకులు ఫార్మ్ హౌస్ పరిశీలనకు వస్తారన్న వార్తల నేపథ్యంలో ప్రదీప్ రెడ్డి మీడియా ముందుకు వచ్చి ఈ వ్యాఖ్యలు చేశారు. తామిద్దరం చిన్ననాటి స్నేహితులమని, అందుకే ఈ ఫార్మ్ హౌస్ను తాను కేటీఆర్కు లీజుకు మాత్రమే ఇచ్చానని ఆయన వెల్లడించారు.
ఈ ఫార్మ్ హౌస్ భూములపై ఎలాంటి వివాదాలు లేవని, ఈ భూములకు లీగల్గా పూర్తి క్లియర్ టైటిల్ ఉందని ప్రదీప్ రెడ్డి తేల్చిచెప్పారు. ప్రభుత్వానికి లేదా సంబంధిత అధికారులకు ఏవైనా అనుమానాలు ఉంటే తమకు నోటీసులు జారీ చేసి వివరణ కోరవచ్చని, ప్రభుత్వ అధికారులు ఏ పత్రాలు కోరినా నిబంధనల ప్రకారం సమర్పించడానికి తాను సిద్ధంగా ఉన్నానని ఆయన తెలిపారు. అయితే రాజకీయ నేతలు వచ్చి ఒక వ్యక్తిగత ఆస్తిని పరిశీలిస్తామని చెప్పి వివాదం సృష్టించడం సరికాదని ఆయన హితవు పలికారు.
వ్యక్తిగత ఆస్తులను రాజకీయ వేదికలుగా మార్చడం, తద్వారా అనవసర రచ్చ చేయడం వల్ల ఎలాంటి ప్రయోజనం ఉండదని ప్రదీప్ రెడ్డి ఆవేదన వ్యక్తం చేశారు. చట్టపరంగా ఎలాంటి విచారణకైనా తాము సిద్ధంగా ఉన్నామని, కానీ అనవసరమైన రాజకీయ లబ్ది కోసం ఆస్తులను వివాదాల్లోకి లాగడం సరికాదని ఆయన అభిప్రాయపడ్డారు. ఈ తాజా ప్రకటనతో జన్వాడ ఫార్మ్ హౌస్కు సంబంధించిన భూ వివాదంపై మరింత స్పష్టత వచ్చినట్లయింది.
