న్యూఢిల్లీ:ఏజెంటిక్ ఆర్టిఫిషియల్ ఇంటెలిజెన్స్ (AI) వినియోగం పెరగడం, పటిష్టమైన దేశీయ డిజైన్ వ్యవస్థ అందుబాటులో ఉండటంతో ప్రపంచ సెమీకండక్టర్ రంగంలో భారత్ అగ్రగామిగా నిలిచేందుకు సిద్ధంగా ఉందని ఇంటెల్ సంస్థ తెలిపింది. గురువారం జరిగిన ‘సెమికాన్ ఇండియా 2026’ సదస్సులో ఇంటెల్ సెంట్రల్ ఇంజనీరింగ్ గ్రూప్ సీనియర్ వైస్ ప్రెసిడెంట్ శ్రీనివాసన్ అయ్యంగార్ మాట్లాడారు. నైపుణ్యం కలిగిన మానవ వనరులు, విద్యా రంగంలో వస్తున్న ఆవిష్కరణలు, పెరుగుతున్న డీప్-టెక్ స్టార్టప్ల కారణంగా భారత సెమీకండక్టర్ రంగం అద్భుత పురోగతి సాధిస్తోందని ఆయన కొనియాడారు.
ప్రపంచ చిప్ డిజైన్, VLSI నైపుణ్య వనరుల్లో భారత్ ఇప్పటికే 20 శాతం వాటాను కలిగి ఉందని, దేశంలో 85,000 మందికి పైగా నిపుణులు ఉన్నారని అయ్యంగార్ వెల్లడించారు. దేశంలోని 355కి పైగా విశ్వవిద్యాలయాలు అధునాతన కోర్సులను అందిస్తుండగా, విద్యా సంస్థలు 250కి పైగా చిప్లను రూపొందించడం పటిష్టమైన పునాదికి నిదర్శనమని చెప్పారు. భారత్లో గత నాలుగు దశాబ్దాలుగా ఇంటెల్ తన కార్యకలాపాలను విస్తరిస్తోందని, రాబోయే పదేళ్ల పాటు ఈ భాగస్వామ్యాన్ని మరింత ముందుకు తీసుకెళ్లేందుకు సిద్ధంగా ఉన్నామని ఆయన స్పష్టం చేశారు.
