సూర్య ఆంధ్రప్రదేశ్ డెస్క్: భీమిలి ఎమ్మెల్యే, మాజీ మంత్రి గంటా శ్రీనివాసరావు మనవడు, తొమ్మిదేళ్ల గంటా జిష్ణు ఆర్యన్ అంతర్జాతీయ స్థాయిలో అరుదైన ఘనత సాధించాడు. ఇప్పటికే గిన్నిస్ వరల్డ్ రికార్డు సాధించి తన అసాధారణ జ్ఞాపకశక్తిని చాటుకున్న జిష్ణు, తాజాగా ప్రతిష్టాత్మక ఆక్స్ఫర్డ్ టెడ్ ఎక్స్ ఒస్నే వేదికపై ప్రసంగించి అందరినీ అబ్బురపరిచాడు. ఇంత చిన్న వయసులోనే అంతర్జాతీయ వేదికపై ఆత్మవిశ్వాసంతో ప్రసంగించిన అతి కొద్దిమంది బాలల్లో ఒకడిగా నిలిచి తెలుగు ఖ్యాతిని ప్రపంచానికి చాటాడు. నారాయణ విద్యాసంస్థల డైరెక్టర్లుగా ఉన్న తల్లిదండ్రులు గంటా రవితేజ, శరణి ప్రోత్సాహంతో ఎదిగిన జిష్ణు, ఈ వేదికపై తన తల్లితో కలిసి పాల్గొనడం విశేషం. ఆంధ్రప్రదేశ్ పురపాలక శాఖ మంత్రి పొంగూరు నారాయణ కూడా జిష్ణు ఆర్యన్కు తాత కావడం గమనార్హం.
గతంలో గణితంలో అత్యంత సంక్లిష్టమైన గోల్డెన్ రేషియోలోని 216 దశాంశ స్థానాలను కేవలం నిమిషం లోపే అనర్గళంగా చెప్పి గిన్నిస్ వరల్డ్ రికార్డ్ సాధించిన జిష్ణు, ఆక్స్ఫర్డ్ వేదికపై తన వినూత్న ఆలోచనలతో సభికులను ఆకట్టుకున్నాడు. 'క్కు వాడిస్ - వేర్ ఆర్ యూ గోయింగ్?' అనే ప్రత్యేక ఇతివృత్తంపై మాట్లాడిన ఈ బుడతడు, చిన్న వయసులోనే ఎంతో పరిపక్వతతో కూడిన భావాలను పంచుకున్నాడు. ముఖ్యంగా ఫుట్బాల్ ఆటపై తనకు ఉన్న అపారమైన మక్కువను ప్రస్తావిస్తూ, తన భవిష్యత్తును తానే స్వయంగా నిర్దేశించుకుంటానని స్పష్టం చేశాడు. పెద్దల ఆశయాలు, సమాజపు ఒత్తిళ్లకు తలొగ్గకుండా పిల్లలు తమ సొంత కలలను ఎలా సాకారం చేసుకోవాలో తనదైన శైలిలో వివరించాడు.
జీవితంలో ఎదురయ్యే గెలుపు ఓటములకు కృంగిపోకూడదని, భయాలను అధిగమించి ముందుకు సాగడమే నిజమైన విజయమని జిష్ణు ఆర్యన్ చేసిన ప్రసంగం శ్రోతలను ఎంతగానో ఆలోచింపజేసింది. చిన్న వయసులోనే ఆత్మవిశ్వాసం, పట్టుదల, లక్ష్య సాధన గురించి అతను విశ్లేషించిన తీరు అంతర్జాతీయ ప్రతినిధులను మంత్రముగ్ధులను చేసింది. పిల్లల్లోని ప్రతిభను గుర్తించి ప్రోత్సహిస్తే వారు అద్భుతాలు సృష్టిస్తారని నిరూపించిన జిష్ణు ఆర్యన్పై కుటుంబ సభ్యులు, పలువురు ప్రముఖులు, నెటిజన్లు ప్రశంసల జల్లు కురిపిస్తున్నారు.
