ఈనెల 19 నుంచి నైరుతి రుతుపవనాల తిరోగమనం.. తెలుగు రాష్ట్రాల్లో 18-20 తేదీల్లో భారీ వర్షాలు: IMD వెల్లడి

ఈ నెల 19 నుంచి నైరుతి రుతుపవనాల తిరోగమనం ప్రారంభం కానుందని భారత వాతావరణ శాఖ (IMD) వెల్లడించింది. 

దేశవ్యాప్తంగా విస్తరించిన నైరుతి రుతుపవనాల తిరోగమనం (Monsoon Withdrawal) ఈ నెల 19 నుంచి ప్రారంభమయ్యే అవకాశం ఉందని భారత వాతావరణ విభాగం (IMD) వెల్లడించింది. తొలుత వాయవ్య భారతంలోని పశ్చిమ రాజస్థాన్ ప్రాంతం నుంచి రుతుపవనాలు వెనక్కి మళ్లడం ప్రారంభమవుతుందని వాతావరణ నిపుణులు తెలిపారు.
కొనసాగుతున్న వర్షపాత లోటు:
ప్రస్తుత సీజన్‌లో దేశవ్యాప్తంగా సాధారణం కంటే 15 శాతం మేర వర్షపాత లోటు నమోదైందని ఐఎండీ పేర్కొంది. ముఖ్యంగా దక్షిణాది రాష్ట్రాల్లో లోటు తీవ్రత ఎక్కువగా ఉంది. ఆంధ్రప్రదేశ్‌లో ఏకంగా 43 శాతం, తెలంగాణలో 20 శాతం మేర వర్షపాత లోటు కొనసాగుతున్నట్లు గణాంకాలు స్పష్టం చేస్తున్నాయి.
దక్షిణాదిలో 21 వరకు వర్షాలు – ఏపీ, తెలంగాణలకు హెచ్చరిక:
రుతుపవనాలు ఉపసంహరణ దిశగా సాగుతున్నప్పటికీ, దక్షిణాది రాష్ట్రాల్లో మాత్రం ఈ నెల 21వ తేదీ వరకు వర్షాలు కొనసాగుతాయని వాతావరణ శాఖ అంచనా వేసింది. ముఖ్యంగా ఆంధ్రప్రదేశ్, తెలంగాణ రాష్ట్రాల్లో సెప్టెంబర్ 18 నుంచి 20వ తేదీల మధ్య పలుచోట్ల తేలికపాటి నుంచి మోస్తరు వర్షాలు, కొన్ని ప్రాంతాల్లో ఉరుములు, మెరుపులతో కూడిన భారీ వర్షాలు కురిసే అవకాశం ఉందని ఐఎండీ తెలిపింది. రైతులు, ప్రజలు వాతావరణ హెచ్చరికలను గమనిస్తూ అప్రమత్తంగా ఉండాలని అధికారులు సూచించారు.