తెలంగాణ రైతులకు త్వరలోనే అకౌంట్లలోకి డబ్బులు

తెలంగాణలోని రైతులకు రేవంత్ రెడ్డి సర్కార్ మరో తీపికబురు వినిపించింది. అకాల వర్షాల వల్ల నష్టపోయిన రైతులకు త్వరలోనే నష్టపరిహారం అందించనున్నట్టు వ్యవసాయశాఖ మంత్రి తుమ్మల నాగేశ్వర రావు ప్రకటించారు. నిజామాబాద్‌లో జరిగిన రైతు మహోత్సవంలో మంత్రులు ఉత్తమ్ కుమార్ రెడ్డి, జూపల్లి కృష్ణా రావుతో కలిసి పాల్గొన్న మంత్రి తుమ్మల నాగేశ్వర రావు.. రైతు సంక్షేమం పట్ల రేవంత్ రెడ్డి సర్కార్ నిబద్ధతతో ఉందని చెప్పుకొచ్చారు.

ఈ సందర్భంగా మాట్లాడిన తుమ్మల నాగేశ్వర రావు.. దేశంలోనే తెలంగాణ రైతు సంక్షేమ పథకాలకు ప్రత్యేక స్థానం ఉందని ఉద్ఘాటించారు. పసుపు రైతుల ఆర్థిక భరోసాకు మద్దతు ధర ఎంతైనా అవసరమని మంత్రి తుమ్మల నాగేశ్వర రావు అభిప్రాయపడ్డారు. పసుపు పంటకు పేరుగాంచిన నిజామాబాద్ జిల్లా రైతులకు ప్రభుత్వం అండగా ఉంటుందని భరోసా ఇచ్చారు. గతంలో ఒకే విడతలో రూ.2 లక్షల వరకు రుణమాఫీ చేసిన ఘనత తమ ప్రభుత్వానికే దక్కుతుందని గుర్తు చేశారు. అయితే.. కొన్ని అనివార్య కారణాల వల్ల నిలిచిపోయిన 'రైతు భరోసా' పథకాన్ని త్వరలోనే పునరుద్ధరించి.. అర్హులైన రైతుల ఖాతాల్లో నిధులు జమ చేస్తామని మంత్రి హామీ ఇవ్వడం గమనార్హం.

గత బీఆర్ఎస్ ప్రభుత్వం రైతు బంధు పథకాన్ని అమలు చేసినప్పటికీ.. వ్యవసాయ రంగానికి అవసరమైన ఇతర మద్దతును విస్మరించిందని తుమ్మల నాగేశ్వర రావు విమర్శించారు. ముఖ్యంగా వ్యవసాయ యంత్ర పరికరాల పంపిణీ గత పదేళ్లలో జరగలేదని ఆరోపించారు. తమ ప్రభుత్వం అధికారంలోకి వచ్చిన వెంటనే ఈ ప్రక్రియను తిరిగి ప్రారంభించామని ఆయన తెలిపారు. అంతేకాకుండా.. ప్రతి జిల్లాలో ఆయిల్‌పామ్ పరిశ్రమను ఏర్పాటు చేయడం ద్వారా రైతులకు కొత్త ఆదాయ మార్గాలను సృష్టిస్తామని మంత్రి స్పష్టం చేశారు. నిజామాబాద్, కామారెడ్డి జిల్లాల్లో ఆయిల్‌పామ్ సాగు యొక్క ప్రాముఖ్యతను నొక్కిచెబుతూ.. దాని వల్ల కలిగే ఆర్థిక ప్రయోజనాలను వివరించారు. ఎకరం ఆయిల్‌పామ్ సాగు ద్వారా 4 ఎకరాల వరి సాగులో వచ్చే ఆదాయాన్ని పొందవచ్చని మంత్రి పేర్కొన్నారు. దేవరకొండకు చెందిన ఒక రైతు కుంకుడుకాయల సాగుతో లక్షల రూపాయలు సంపాదిస్తున్న ఉదాహరణను మంత్రి ప్రస్తావించారు.

మొత్తంగా.. మంత్రి తుమ్మల నాగేశ్వర రావు చేసిన ప్రకటనలు రైతు సంక్షేమం పట్ల ప్రభుత్వ చిత్తశుద్ధిని తెలియజేస్తున్నాయి. అయితే.. ప్రకటించిన పథకాలు ఎంత త్వరగా అమలవుతాయి. రైతుల సమస్యలు ఎంతవరకు పరిష్కారమవుతాయి అనేది వేచి చూడాలి. పసుపు రైతులకు మద్దతు ధర కల్పించడం, నిలిచిపోయిన రైతు భరోసాను పునరుద్ధరించడం వంటి అంశాలపై ప్రభుత్వం ఎలా చర్యలు తీసుకుంటుందనేది రానున్న రోజుల్లో స్పష్టత రానుంది.