by Suryaa Desk | Wed, Jan 28, 2026, 10:50 PM

భారత టెస్ట్ క్రికెట్ గత కొన్నేళ్లుగా డౌన్ ఫాల్ చూస్తోంది. వరుసగా రెండు హోం వైట్‌వాష్‌లు, ఆపై విదేశాల్లో ఎదురైన పరాజయాలు ఈ పతనానికి నిదర్శనంగా నిలిచాయి. మరోవైపు వన్డే, టీ20 ఫార్మాట్‌లలో మాత్రం టీమిండియా ఆధిపత్యం కొనసాగుతూనే ఉంది. ఈ స్పష్టమైన వ్యత్యాసంపై టీమిండియా మాజీ కోచ్ రాహుల్ ద్రవిడ్ ఘాటు వ్యాఖ్యలు చేశాడు.

గౌతమ్ గంభీర్ కోచ్‌గా బాధ్యతలు స్వీకరించిన తర్వాత న్యూజిలాండ్‌తో స్వదేశంలో ఎదురైన ఓటములు, ఆస్ట్రేలియాలో వచ్చిన ఎదురుదెబ్బలు టెస్ట్ జట్టులోని బలహీనతలను బయటపెట్టాయి. గతేడాది దక్షిణాఫ్రికాతో హోం సిరీస్‌లోనూ భారత ఓటమిపాలయింది. స్పిన్‌కు అనుకూలమైన పిచ్‌లపై ఆడేటప్పుడు చాలామంది బ్యాటర్లు స్పష్టత లేకుండా కనిపించారు.

విరాట్ కోహ్లీ, రోహిత్ శర్మ, రవిచంద్రన్ అశ్విన్ లాంటి సీనియర్ ఆటగాళ్ల రిటైర్మెంట్‌తో జట్టు మార్పు దశలోకి వెళ్లింది. ఈ సమయంలో మిడిలార్డర్ బ్యాటింగ్ ఇంకా స్థిరపడకపోవడం టీమిండియాకు పెద్ద సమస్యగా మారింది. ఈ నేపథ్యంలో మాజీ హెడ్ కోచ్ రాహుల్ ద్రవిడ్ టెస్ట్ క్రికెట్‌లో ఆటగాళ్లు ఎదుర్కొంటున్న అసలు సమస్యను బయటపెట్టాడు. మూడు ఫార్మాట్‌లు ఆడే ఆటగాళ్లకు టెస్ట్ మైండ్‌సెట్‌లోకి వెళ్లడానికి సరైన సమయం దొరకడం లేదని ఆయన చెప్పుకొచ్చాడు.

బెంగళూరులో ది రైజ్ ఆఫ్ ది హిట్‌మ్యాన్: ది రోహిత్ శర్మ స్టోరీ పుస్తకావిష్కరణ సందర్భంగా మాట్లాడుతూ ద్రవిడ్ కీలక వ్యాఖ్యలు చేశాడు. “కొన్నిసార్లు టెస్ట్ మ్యాచ్‌కు మూడు, నాలుగు రోజుల ముందు మాత్రమే జట్టు అక్కడికి చేరుతుంది. అప్పుడు ప్రాక్టీస్ మొదలుపెట్టినప్పుడు, చివరిసారి కొంతమంది బ్యాటర్లు రెడ్ బాల్ ఆడింది నాలుగు లేదా ఐదు నెలల కిందటే అని తెలుస్తుంది” అని ద్రవిడ్ అన్నాడు.

టర్నింగ్ ట్రాక్‌లు, సీమింగ్ పిచ్‌లపై గంటల కొద్దీ ఓపికతో ఆడే నైపుణ్యం టెస్ట్ క్రికెట్‌లో కీలకమని ద్రవిడ్ గుర్తు చేశాడు. “మా తరం రోజుల్లో రెండు ఫార్మాట్‌లే ఉండేవి. ఫ్రాంచైజీ క్రికెట్ కూడా లేదు. ఒక టెస్ట్ సిరీస్ కోసం నెల రోజుల పాటు రెడ్ బాల్‌తో ప్రాక్టీస్ చేసే అవకాశం ఉండేది. అదే మా బలం” అని ద్రవిడ్ వివరించాడు.

ప్రస్తుతం సాయి సుదర్శన్, కరుణ్ నాయర్ లాంటి ఆటగాళ్లకు అవకాశాలు ఇచ్చినా మిడిలార్డర్ బ్యాటింగ్ లోటును మరింత స్పష్టంగా చూపిస్తోంది. శుభ్‌మన్ గిల్ ఉదాహరణను కూడా ద్రవిడ్ ప్రస్తావించాడు. “మూడు ఫార్మాట్‌లు ఆడే ఆటగాళ్లకు రెడ్ బాల్ క్రికెట్‌పై ఫోకస్ పెట్టడానికి సమయం ఉండదు. శుభ్‌మన్ గిల్ కూడా ఇటీవలి కాలంలో మూడు ఫార్మాట్‌లు ఆడాడు. టెస్ట్ క్రికెట్‌కు సిద్ధమవ్వడం ఎంత కష్టమో అతనికీ అర్థమై ఉంటుంది” అని ద్రవిడ్ అన్నాడు.